თბილისი, 15 ნოემბერი, საქინფორმი. როგორც ცნობილია, 2011 წლის 13 ნოემბერს, წმიდა 100 000 ქართველი მოწამის ხსენების დღესთან დაკავშირებით, სამების საკათედრო ტაძარში საკვირაო ქადაგებისას საქართველოს კათოლიკოს-პატრიარქმა, მცხეთა-თბილისის მთავარეპისკოპოსმა, ბიჭვინთისა და ცხუმ-აფხაზეთის მიტროპოლიტმა, უწმიდესმა და უნეტარესმა ილია მეორემ ბიზენსმენ და პოლიტიკოს ბიძინა ივანიშვილისთვის მოქალაქეობის აღდგენის აუცილებლობაზე ისაუბრა და ბრძანა, რომ „ბიძინა ივანიშვილი საქართველოს მოქალაქე უნდა იყოს“. ამასთან, პატრიარქმა აღნიშნა, რომ იგი დარწმუნებულია, პრეზიდენტი ბიზნესმენს საქართველოს მოქალაქეობას მიანიჭებს.

პატრიარქის ამ განცხადებას ხელისუფლების წარმომადგენლებისგან განსხვავებით, ოპოზიცია გამოეხმაურა. როგორც „თავისუფალი დემოკრატების“ ლიდერმა ირაკლი ალასანიამ განაცხადა, „ბიძინა ივანიშვილისთვის საქართველოს მოქალაქეობის აღდგენის თაობაზე უწმიდესმა ქართველი ხალხის სათქმელი თქვა“. ალასანია მიიჩნევს, რომ „საკვირაო ქადაგებისას პატრიარქის მიერ გაკეთებული განცხადება სწორედ ქართველი საზოგადოების სურვილს ეხმიანება“.