თბილისი, 14 ნოემბერი, საქინფორმი. საქართველოს საკანონმდებლო ორგანოში  გადაწყვეტილებების მიღებისას კენჭისყრის გაყალბების ფაქტები ახალი არ არის - სხვა დეპუტატის ნაცვლად დეპუტატი მაშინ აძლევს ხმას, როცა ეს სხვა დეპუტატი დარბაზში არ იმყოფება, სხდომას არასაპატიო მიზეზით აცდენს ან დარბაზში დეპუტატთა საკმარისი რაოდენობა არ არის და სხვისი პულტის გამოყენება საკითხის გატანის ერთადერთი საშუალებაა.

ამჯერად კენჭისყრის გაყალბების კონკრეტული ფაქტები „პალიტრაTV“-ის ობიექტივში მოხვდა. საპარლამენტო უმრავლესობის წევრები სხვა დეპუტატების პულტებს აჭერენ თითს. თუმცა აღმოჩნდა, რომ გაყალბება ხდება არა მხოლოდ იმ შემთხვევაში, როცა რომელიმე დეპუტატი ადგილზე არ არის, არამედ მაშინაც, თუ ის დარბაზშია (ინტერნეტმაუწყებლის კადრებში ნათლად ჩანს, რომ საპარლამენტო უმრავლესობის ლიდერი პეტრე ცისკარიშვილი დარბაზში ზის, პულტს თავად არ აჭერს თითს და ამ ფუნქციას მისი გვერდით მჯდომი გიორგი იმნაძე ასრულებს).