ზუგდიდი, 10 ნოემბერი, საქინფორმი. ზუგდიდის საკრებულოს გუშინდელი გადაწყვეტილებით, ადგილობრივი ბიუჯეტიდან შსს სამხარეო სამმართველო დამატებით 55 100 ლარით დაფინანსდება. 10 ათასი ლარი დაემატება კონსტიტუციური უსაფრთხოების ზუგდიდის განყოფილების დაფინანსებასაც.

შსს-ის ადგილობრივი ორგანოებისთვის ზუგდიდის ადგილობრივმა მთავრობამ ფულის გამოყოფა ბიუჯეტის სხვა მუხლებისთვის გამოკლებული თანხებით მოახერხა. და ეს მაშინ, როცა შსს-ის სამხარეო სამმართველოსაც და კუდ-საც თანხები ცენტრალური ბიუჯეტიდან ერიცხებათ.

შსს-ის ადგილობრივ ორგანოებს 11 ათასი ლარით დაფინანსება გაუზარდა ჩხოროწყუს საკრებულომაც. თანხამ კი მიმდინარე წელს ერთიანობაში 240 ათას ლარს გადააჭარბა. ზუგდიდის მსგავსად, ჩხოროწყუშიც შსს-ს ორგანოების დაფინანსება სპეციალურად გამოთავისუფლებული თანხებით მოხერხდა.