საზოგადოება
მიხეილ სააკაშვილი: „ყველაზე მეტად პენსიონერების დახმარება და ეკონომიკის განვითარება მსურს“
თბილისი, 10 ნოემბერი, საქინფორმი. საქართველოს პრეზიდენტმა მთავრობის წევრებთან ერთად გუშინ პენსიის ზრდისა და პენსიონერთა დაზღვევის საკითხი განიხილა. მისი განცხადებით, პენსიის ზრდის პოლიტიკა, დაპირებისამებრ, გრძელდება და საპენსიო პაკეტი მომავალი წლიდან 140 ლარს შეადგენს.
მიხეილ სააკაშვილმა პრემიერ-მინისტრისგან დეტალური ინფორმაცია მოითხოვა იმის თაობაზე, თუ რა რესურსი აქვს ქვეყანას იმისათვის, რომ პენსიონერებს 140-ლარიანი საპენსიო პაკეტი შესთავაზოს. როგორც ნიკა გილაურმა განაცხადა, სადაზღვევო პაკეტის ფარგლებში 15 000 ლარამდე გეგმური ოპერაცია 20-პროცენტიანი თანადაფინანსებით ანაზღაურდება, ხოლო გადაუდებელი ოპერაციები ულიმიტოა და ამ შემთხვევაშიც სახელმწიფოს მხრივ დაფინანსება 80 პროცენტს შეადგენს. რაც შეეხება წამლების ანაზღაურებას, დაზღვევის ფარგლებში, ლიმიტი 200 ლარით განისაზღვრა და სახელმწიფო მათი ღირებულების 50 პროცენტს დაფარავს.
„მომავალ წელს პენსიების ზრდის ტენდენცია გაგრძელდება, მაგრამ ჩემი დაპირება არ დამვიწყებია. როგორი კრიზისიც უნდა იყოს, ჩემი პრეზიდენტობის ვადის ამოწურვამდე პენსიების ზრდა ეტაპობრივად უნდა გაგრძელდეს. ჩვენ მაქსიმალურად უნდა დავუახლოვდეთ და შევასრულოთ ის დაპირება, რომელიც 2008 წლის იანვარში მივეცით მოსახლეობას. ჩვენ ყოველთვის ვამბობთ, რომ ჩვენი საზოგადოების ყველაზე დამსახურებული და, ამავე დროს, დაუცველი ნაწილი არიან ჩვენი პენსიონერები. ამიტომ, რა თქმა უნდა, მათთვის ორი საკითხია მთავარი –ჯანდაცვა და დაზღვევა“, – განაცხადა საქართველოს პრეზიდენტმა და დასძინა – „ყველაზე მეტად პენსიონერების დახმარება და ეკონომიკის განვითარება მსურს“.
