თბილისი, 3 ნოემბერი, საქინფორმი. საპარლამენტო უმრავლესობის ერთ-ერთი ლიდერის – პავლე კუბლაშვილის ინფორმაციით, ბიძინა ივანიშვილი რუსეთის წიაღისეულის მეხუთედს ფლობს. კუბლაშვილმა ამის შესახებ განცხადება „მაესტროს“ ეთერში საუბრისას გააკეთა. ჟურნალისტის კითხვაზე – რით გამოიხატება კრემლის გავლენა ივანიშვილზე? – კუბლაშვილმა ასეთი პაუხი გასცა: „გაზპრომის“ 1%-ში და მთელი რუსეთის წიაღისეულის 1/5-ს როცა ფლობ, ეს არის გავლენა“. მისივე თქმით, რუსეთში ბიზნესის კეთება კრემლთან კავშირის გარეშე შეუძლებელია.

„რუსეთში მთელი ქართველი საზოგადოების მიმართ კრემლის მხრიდან იყო აგრესია. ადამიანებს რუსეთიდან სატვირთო თვითმფრინავებით აგზავნიდნენ. ყველა ბიზნესი, რომელიც ქართულ სახელებთან იყო დაკავშირებული, გაჩერდა. ერთადერთი ადამიანი, რომელმაც სრულად შეინარჩუნა საკუთარი ბიზნესი, ბიძინა ივანიშვილია“, – აღნიშნა კუბლაშვილმა.

კითხვაზე – როცა ივანიშვილი იყო ხელისუფლების პარტნიორი, მაშინ არ ჰქონდა კრემლს მასზე გავლენა? – კუბლაშვილმა უპასუხა: „შეიძლება ეს გავლენა ჰქონდა, მაგრამ ახლა ამ გავლენას ხელისუფლებაში მოსასვლელად იყენებს“.