თბილისი, 3 ოქტომბერი, საქინფორმი. ივანიშვილის პრესკონფერენციაზე კითხვის დასმის გამო საზოგადოებრივი მაუწყებლის ჟურნალისტს, ყოველთვიური ჟურნალი „მაუწყებლის“ მთავარ რედაქტორ ირაკლი ტაბლიაშვილს სამსახურიდან ათავისუფლებენ. აღნიშნულ ინფორმაციას გაზეთი „რეზონანასი“ ავრცელებს. ირაკლი ტაბლიაშვილმა ბრიფინგზე „აისაფში“ ქართული კონტინგენტის მონაწილეობასთან დაკავშირებით დასვა კითხვა, მაგრამ საზოგადოებრივი მაუწყებლის ხელმძღვანელობა ამ კითხვის შესავალი ნაწილით უკმაყოფილო დარჩა. შესავალ ნაწილში ტაბლიაშვილმა განაცხადა: „მეც საზოგადოებრივ მაუწყებელს წარმოავადგენ. თუმცა გარწმუნებთ, არ მაქვს „დარიგებული“ კითხვა... მე მაინტერესებს ის, რაც საზოგადოებრივი ინტერესია“.

როგორც „რეზონანსი“ საკუთარ წყაროზე დაყრდნობით აცხადებს, ამის გამო ტელევიზიის ხელმძღვანელობამ ირაკლი ტაბლიაშვილის სამსახურიდან გათავისუფლება გადაწყვიტა, რადგან ჩათვალეს, რომ მან ამით აღიარა  ტელევიზიების ჟურნალისტთა მიერ დასმული კითხვების თითქოსდა ხელისუფლებასთან შეთანხმება. ამავე წყაროს ინფორმაციით, ტაბლიაშვილი დაიბარეს საზოგადოებრივი მაუწყებლის დირექტორმა გია ჭანტურიამ და სამეთვალყურეო საბჭოს თავმჯდომარე ლევან გახელაძემ და ჩაკეტილ ოთახში თათბირობდნენ. თუმცა ამ შეხვედრაზე რა ითქვა, არავინ იცის.