საზოგადოება
იაკობ გოგებაშვილის უნიკალური ნივთები ხელოვნების სასახლეს გადაეცა
თბილისი, 29 ოქტომბერი, საქინფორმი. როგორც თეატრის, მუსიკის, კინოსა და ქორეოგრაფიის სახელმწიფო მუზეუმის პრესსამსახურიდან საქინფორმს აცნობეს, მუზეუმში გაიმართა დიდი საზოგადო მოღვაწე იაკობ გოგებაშვილის 171 წლის იუბილესთან დაკავშირებული უცნობი მემორიალური ნივთებისა და არქივის პრეზენტაცია. აღნიშნული ნივთები მუზეუმს მიმდინარე წელს იაკობ გოგებაშვილის სახელობის პედაგოგთა კავშირმა გადასცა, რომლებიც ათეულობით წლის განმავლობაში აგროვებდნენ დიდი ქართველი განმანათლებლის ნივთებს. ხელოვნების სასახლისთვის ამ ექსპონატების უსასყიდლოდ გადაცემა განაპირობა გოგებაშვილის მუზეუმში დაცული არქივის ნაწილის ერთ კოლექციად გაერთიანებამ. აღსანიშნავია ის გარემოება, რომ იაკობ გოგებაშვილის მემორიალური ნივთები და არქივი განსაკუთრებულ ეროვნულ იშვიათობას წარმოადგენს და ფართო საზოგადოებისთვის მიუწვდომელი იყო.
გადმოცემული საგანძური განსაკუთრებულ მნიშვნელობას იძენს, რადგან აქ დაცულია დიდი განმანათლებლის დღემდე უცნობი ნივთები: სამუშაო კაბინეტის ავეჯი, ამპირის სტილის ტახტრევანი სავარძლებით, ბროლისაგან დამზადებული სარკე, გოგებაშვილის მაგიდის გარნიტური, ბროლისა და საქსის ფაიფურისგან დამზადებული მემორიალური ჭურჭელი, მაგიდის ლამპა, რომლის შუქზეც, გადმოცემის მიხედვით, „დედაენა“ დაიწერა. იაკობ გოგებაშვილის ხელნაწერი არქივი შეიცავს წერილებს, მის პირად პასპორტს და, რაც ყველაზე მნიშვნელოვანია, მის ანდერძს ქართველი საზოგადოებისადმი.
გადმოცემულ ექსპონატებს შორის არის იაკობ გოგებაშვილის საფულე და ბრინჯაოს ქანდაკება, რომელიც დიდ განმანათლებელს მთელი ცხოვრება მაგიდაზე ედგა.
ბეჭდური გამოცემებიდან განსაკუთრებული აღნიშვნის ღირსია „დედაენის“ პირველი გამოცემები და გოგებაშვილის მიერ შედგენილი „რუსკოე სლოვოს“ ტყვიის ასოები სტამბისთვის.
