თბილისი, 28 ოქტომბერი, საქინფორმი. ასე აფასებს კარნეგის ფონდის რუსეთისა და ევრაზიის პროგრამების უფროსი სპეციალისტი თომას დე ვაალი ბიზნესმენ ბიძინა ივანიშვილის პოლიტიკაში მოსვლას „The National Interest“-ში გამოქვეყნებულ სტატიაში. დე ვაალი წერს, რომ ბოლო დროს ქართული პოლიტიკა მოსაწყენი და ადვილად პროგნოზირებადი გახდა, თუმცა მოვიდა ოლიგარქი, რომელმაც ორ კვირაში შიდა ქართული პოლიტიკური სცენა შეარყია.

„იმის მიუხედავად, რომ იგი რუსეთის უდიდეს ბანკ „რასიისკი კრედიტს“ ფლობდა, მაინც შეუმჩნეველ ფიგურად რჩებოდა განსხვავებით ორი სხვა ელვარე ქართველი მაგნატისგან, რომლებმაც ფული რუსეთში დააგროვეს – კახა ბენდუქიძისა და ბადრი პატარკაციშვილისგან. ცხრა წლის წინ ის საქართველოში დაბრუნდა, მშობლიურ სოფელ ჭორვილაში დასახლდა და გზებზე, სკოლებზე, ეკლესიებსა და თეატრებზე მილიონების ხარჯვა დაიწყო“, – წერს დე ვაალი.