ზუგდიდი, 27 ოქტომბერი, საქინფორმი. ზუგდიდის გამგეობას საკრებულომ ნებართვა მისცა, გამარტივებული შესყიდვის გზით სატრანსპორტო მომსახურეობა შეიძინოს. საუბარია 4 ავტობუსის მომსახურებაზე, რომლებიც ბათუმში გასამართ კლასიკური მუსიკის კონცერტზე მსურველებს ზუგდიდიდან წაიყვანს. თუმცა რა თანხა სჭირდება მომსახურებას, ჯერ ცნობილი არ არის.

საკრებულოს იურისტ ლალი ხარებავას ცნობით, „დღეს მხოლოდ ნებართვა გაიცა, თანხის ოდენობა კი გამგეობას ჯერ არ წარუდგენია“. თუმცა საკრებულო უწყებას თანხის წარდგენის გარეშეც დაეთანხმა და უფლება მისცა, შესყიდვა ეწარმოებინა.

ზუგდიდის საკრებულოს გუშინდელ სხდომაზე გამარტივებული ტენდერების ჩატარების უფლება აიპ „ზუგდიდდასუფთავებას“ და სკოლამდელ სააღმზრდელო დაწესებულებათა ცენტრს ისევ მისცეს.