თბილისი, 24 ოქტომბერი, საქინფორმი. კოლუმბიის უნივერსიტეტის პროფესორი, ექსპერტი საქართველოს საკითხებში ლინკოლნ მიტჩელი მიიჩნევს, რომ „საქართველოს მთავრობას ბიძინა ივანიშვილის მართლაც ეშინია“.

„აშშ-ში მიესალმებიან იმ ფაქტს, რომ საქართველოს პოლიტიკურ ასპარეზზე ერთით მეტი მოთამაშე გამოჩნდა. ამჟამად ამერიკელი პოლიტიკოსების უმრავლესობა ცდილობს, გაიგოს, ვინ არის ბიძინა ივანიშვილი და მეტი შეიტყოს მის შესახებ. გასული ათწლეულის განმავლობაში ის კარჩაკეტილი ფიგურა იყო, არც მედიას ეკონტაქტებოდა, განსხვავებით მრავალი სხვა პოლიტიკოსისგან, ამიტომაც არ ვიცით მისი ვინაობის შესახებ. ამერიკელი ექსპერტები მზად არიან, მეტი შეიტყონ ივანიშვილის შესახებ. მან ახლა თავი უნდა გააცნოს ფართო საზოგადოებას, დასავლეთსაც – მათ შორის და ამაში სიფრთხილე სჭირდება: ზოგი რამ მის სასარგებლოდ მეტყველებს, ზოგი – არა“, – აცხადებს მიტჩელი ინტერვიუში, რომელსაც ინტერნეტგამოცემა „ნეტგაზეთი“ აქვეყნებს.

მისივე თქმით, „აშშ-ში იციან, რომ ამ ადამიანის მიმართ საქართველოს მთავრობამ საკმაოდ ავტორიტარული ნაბიჯები გადადგა“.

„იმ ზომამდე მივიდნენ, რომ მოქალაქეობაც კი ჩამოართვეს. პოლიტიკური მოვლენების განვითარების საწყის ეტაპზე ეს ექსტრემალურ ნაბიჯად მიგვაჩნია“, – აცხადებს ლინკოლნ მიტჩელი და ამის საფუძველზე ასკვნის, რომ „მთავრობას ივანიშვილის მართლაც ეშინია“.

„უფრო ჭკვიანი რომ ყოფილიყო საქართველოს მთავრობა, აუცილებლად მოძებნიდა მასთან ურთიერთობის გზებს. ახლა მისი ეშინიათ და ეს გასაკვირიც არაა, რადგან მან თავად მოახერხა საკუთარი ბიზნესის წარმართვა და ფინანსურ წარმატებას მიაღწია. ივანიშვილს ფინანსურად იგივე შეუძლია გააკეთოს, რასაც მთავრობა აკეთებს“, – აცხადებს მიტჩელი.

რაც შეეხება ხელისუფლების იმ ბრალდებებს, რაც ივანიშვილის „რუსულ პროექტად“ და „რუსეთის ინტერესების გამტარებლად“ წარმოჩენას უკავშირდება, როგორც ამერიკელი ექსპერტი აცხადებს, „საქართველოს მთავრობა ყველას, ვინც მას არ ეთანხმება, პრორუსულ ძალად მიიჩნევს“.