თბილისი, 21 ოქტომბერი, საქინფორმი. ბიზნესმენ ბიძინა ივანიშვილის პირად ადვოკატ ეკა ბესელიას თბილისის საქალაქო სასამართლოში დღეს საქართველოს პრეზიდენტ მიხეილ სააკაშვილის წინააღმდეგ ადმინისტრაციული საჩივარი შეაქვს.

როგორც ბესელია განმარტავს, ის ბიზნესმენისთვის საქართველოს მოქალაქეობის ჩამორთმევასთან დაკავშირებით პრეზიდენტის მიერ ხელმოწერილი ადმინისტრაციული აქტის გაუქმებას და მისთვის საქართველოს მოქალაქეობის აღდგენას მოითხოვს.

შეგახსენებთ, რომ ბიზნესმენ ბიძინა ივანიშვილს საქართველოს პრეზიდენტის 2011 წლის 11 ოქტომბრის ბრძანებულების თანახმად საქართველოს მოქალაქეობა ჩამოერთვა. ხელისუფლება განმარტავს, რომ ეს ივანიშვილის მიერ საფრანგეთის მოქალაქეობის მიღების გამო მოხდა, თუმცა ივანიშვილის გარემოცვა ამტკიცებს, რომ ბიზნესმენმა საფრანგეთის მოქალაქეობის მიღების შემდეგ ორმაგი მოქალაქეობა მიიღო და მისთვის ამ მოქალაქეობის ჩამორთმევა უკანონო ქმედებაა.