თბილისი, 13 ოქტომბერი, საქინფორმი. როგორც პარლამენტის ვიცე-სპიკერმა მიხეილ მაჭავარიანმა ჟურნალისტებს განუცხადა, „თუ ოპოზიცია ფიქრობს, რომ ახლა „ნაციონალურ მოძრაობას“ მაღალი რეიტინგი აქვს და ამას გამოიყენებს არჩევნების ჩასატარებლად, ეს არაადეკვატურია, რადგან ყველა ისე ზომავს, როგორც თვითონ მოიქცეოდა“.

„არჩევნები ჩატარდება მაშინ, როცა ახალი საარჩევნო კანონმდებლობა შევა ძალაში და იქნება ინპლემენტირებული, რაც მომავალი წლის ზაფხულამდე ვერ მოხერხდება, კერძოდ, ამომრჩეველთა სიების გადამოწმება 2012 წლის 1 ივლისამდე უნდა დასრულდეს. ახალი საარჩევნო კოდექსის გარეშე კი არჩევნების ჩატარებას გამოვრიცხავ. კოდექსის პროექტი უკვე გადაგზავნიალია ვენეციის კომისიაში, უახლოეს დღეებში ჩამოვლენ ვენეციის კომისიის ექსპერტები“, – აცხადებს მაჭავარიანი.

რაც შეეხება იმ გარემოებას, შეცვლის თუ არა ბიზნესმენ ბიძინა ივანიშვილის ფაქტორი საარჩევნო კალენდარს, მიხეილ მაჭავარიანი არაფერს ამბობს. მაჭავარიანი კომენტარს არც  იმაზე აკეთებს, მოსალოდნელია თუ არა ივანიშვილის გამოჩენით „ნაციონალურ მოძრაობაში“ გარკვეული რღვევის დაწყება და კადრების გადინება.

ჟურნალისტებმა დღეს აღნიშნულ საკითხზე კიდევ ერთი კომენტარი მოისმინეს ქრისტიან-დემოკრატ ლევან ვეფხვაძისგან, რომელიც რიგგარეშე საპრეზიდენტო და საპარლამენტო არჩევნების აუცილებლობას ვერ ხედავს, თუმცა, როგორც თავადვე აღნიშნა, იქნება თუ არა ვადამდელი არჩევნები, დამოკიდებულია ბიძინა ივანიშვილის აქტიურობასა და ხელისუფლების რეიტინგზე.