თბილისი, 12 ოქტომბერი, საქინფორმი. „ქრისტიან-დემოკრატების“ ლიდერი გიორგი თარგამაძე ბიზნესმენ ბიძინა ივანიშვილს ბადრი პატარკაციშვილის სახელის ხსენებისგან თავის შეკავებას ურჩევს და მას „ტელეიმედის“ ჩაძირვის მიზნით ხელისუფლების ფინანსურ დახმარებაში ადანაშაულებს. საპარლამენტო უმცირესობის წარმომადგენლის მტკიცებით, „ბადრი პატარკაციშვილის პოლიტიკური განადგურებისა და „ტელეიმედის“ ჩაძირვის საქმეში მიხეილ სააკაშვილს სწორედ ბიძინა ივანიშვილი ეხმარებოდა და პატარკაციშვილის წინააღმდეგ საბრძოლველად მას ფინანსურად აძლიერებდა“.

„სწორედ ივანიშვილი იყო ის კაცი, რომელიც პატარკაციშვილის წინააღმდეგ საბრძოლველად მიხეილ სააკაშვილს წლების განმავლობაში აგულიანებდა. ეს არის ადამიანი, რომელმაც ყველაფერი გააკეთა, რათა ქართველ საზოგადოებაში პატარკაციშვილის ნებისმიერი ინიციატივა თუ გამონათქვამი არ ყოფილიყო მხარდაჭერილი. იყო დრო, როდესაც პატარკაციშვილმა ბიზნესფედერაციაში ძალიან მნიშვნელოვანი განცხადებები გააკეთა და საქართველოს ხელისუფლებას ბრალდებები წაუყენა. იქ იყო ჩამონათვალი ყველა იმ პრობლემისა, რომლებიც ივანიშვილისთვის მნიშვნელოვანი და გულისამაჩუყებელი მხოლოდ დღეს გახდა. ეს არის ადამიანი, რომელსაც მაშინ ხმა არ ამოუღია. იმის ნაცვლად, რომ მედიასივრცის დასაბალანსებლად „მეცხრე არხი“ „იმედთან“ ერთად ყოფილიყო, ივანიშვილმა მისი ტელეკომპანია არა მხოლოდ გაიყვანა მედიასივრციდან, არამედ მთელი აპარატურა პირადად მიხეილ სააკაშვილსა და ეროსი კიწმარიშვილს გადასცა. ივანიშვილმა ყველაფერი გააკეთა მიხეილ სააკაშვილის პოზიციების გასაძლიერებლად. ამიტომ მის ადგილზე ნებისმიერ კონტექსტში პატარკაციშვილის სახელისა და გვარის ხსენებას მოვერიდებოდი“, – განაცხადა თარგამაძემ.