სამართალი
მუშებს ხელფასს არ უხდიან
თბილისი, 12 ოქტომბერი, საქინფორმი. როგორც „თავისუფალი საქართველოს“ პრესსამსახური საქინფორმს ატყობინებს, „ქუთაისში პარლამენტის შენობის მშენებლობაზე დასაქმებულ მუშა-მოსამსახურეებს ხელფასი 2-3 თვეა, არ მიუღიათ. აღნიშნულ ობიექტზე სამუშაო პირობები ისეთივეა, როგორიც მე-19 საუკუნის კატორღაში“.
„თავისუფალი საქართველოს“ ქუთაისის საქალაქო ორგანიზაცია მიმართავს პრეზიდენტ მიხეილ სააკაშვილს, დაინტერესდეს ამ საკითხით, გაარკვიოს, თუ როგორ პირობებში უწევთ პარლამენტის მშენებლობაზე დასაქმებულ მუშებს შრომა და რამდენი ხანია, კუთვნილ ხელფასს ვერ იღებენ.
პარტიის მოთხოვნაა, უმოკლეს ვადაში გაცემულ იქნეს აღნიშნული სახელფასო დავალიანება.
