თბილისი, 11 ოქტომბერი, საქინფორმი. ნატო-ში აშშ-ს დელეგაცია მხარს უჭერს საქართველოსთვის MAP-ის მინიჭებას.  ამის შესახებ ნატო-ში შეერთებული შტატების დელეგაციის ხელმძღვანელის, მაიკლ ტერნერის განცხადებაშია ნათქვამი. როგორც სამაუწყებლო კომპანია "რუსთავი 2" იუწყება, კონგრესმენ ტერნერის შეფასებით, საქართველომ წლების განმავლობაში ერაყსა და ავღანეთში უმნიშვნელოვანესი დახმარებით დაამტკიცა, რომ არის სანდო მოკავშირე და უსაფრთხოების გარანტი.

"მე მხარს დავუჭერ წევრობის ერთიანი სამოქმედო გეგმის მინიჭებას საქართველოსთვის ჩიკაგოში 2012 წლის სამიტზე. ნატო-ს გაფართოების პროცესმა ისტორიული წარმატება მოგვიტანა სტაბილურობის, უსაფრთხოების, დემოკრატიის, კანონის უზენაესობის, თანამშრომლობისა და საერთო მიზნების მიღწევის პროცესში მთელ ევროპაში, რომელიც თავისუფალი და ერთიანია", - ნათქვამია ტერნერის განცხადებაში.

იგი ასევე აღნიშნავს, რომ აშშ-ს სენატმა დაიწყო რეზოლუციის განხილვა, რომელიც საქართველოსთან თავისუფალი ვაჭრობის შესახებ შეთანხმების ინიციატივას შეეხება. ტერნერი მოუწოდებს ნატო-ს ყველა წევრს, ასეთივე ნაბიჯის გადადგმისკენ, რათა ხელი შეეწყოს საქართველოსთან სავაჭრო კავშირების გამყარებას.