აქტუალური
„სარკოზობისთვის“ რეგიონებიდან 300 000 ლარი გამოიყო

regionebiiiთბილისი, 7 ოქტომბერი, საქინფორმი. როგორც ცნობილია, დღეს, 2011 წლის 7 ოქტომბერს, თბილისს საფრანგეთის პრეზიდენტი ნიკოლა სარკოზი ეწვევა, რომელიც ქართველ კოლეგასთან ერთად თავისუფლების მოედანზე სიტყვით გამოვა. საქინფორმი გუშინ უკვე წერდა იმის შესახებ, რომ დღევანდელი დღე უქმე დღედ გამოცხადდა და, გარდა ამისა, სახელმწიფო და საჯარო უწყებების ყველა თანამშრომელზე გაიცა ბრძანება, რომ ისინი აუცილებლად უნდა მივიდნენ თავისუფლების მოედანზე დაგეგმილ ღონისძიებაზე.

დღეს კი ცნობილი ხდება, რომ „ნაცმოძრაობას“ ადგილობრივი ხელისუფლების წარმომადგენლები, პედაგოგები და „შერჩეული“ მოსახლეობა რეგიონებიდანაც ჩამოჰყავს. ეს კი, საქინფორმის ინფორმაციით, თითოეულ რაიონულ ცენტრზე ადგილობრივ ბიუჯეტს 4-6 ათასამდე ლარი უჯდება, რაც, საერთო ჯამში, უხეშად რომ ვიანგარიშოთ, 300 ათას ლარს აღემატება (მოგეხსენებათ, საქართველოში სულ 64 რაიონული ცენტრია).

მუნიციპალიტეტებში ადგილობრივი ხელისუფლების წარმომადგენლები ჟურნალისტებთან კომენტარს ან საერთოდ არ აკეთებენ, ან მოკლე განმარტებით იფარგლებიან და ამბობენ, რომ „მოსახლეობა თბილისობის დღესასწაულზე მიჰყავთ“. თავად „ნაცმოსახლეობის“ ნაწილი კი, რომელიც ჯერ არ „დაურიგებიათ“, ამბობს, რომ „თან ექსკურსიაზე მიდის და „თბილისობას“ დაესწრება, თან სარკოზის გამოსვლასაც მოუსმენს, რადგან ის საქართველოს დიდი გულშემატკივარია და საჭირო დროს ქვეყნის გვერდითაა“.