ზუგდიდი, 6 ოქტომბერი, საქინფორმი. ზუგდიდის მუნიციპალიტეტის სოფელ ჭკადუაშის საჯარო სკოლაში ახალდანიშნულმა დირექტორმა მანუჩარ ხარებავამ ხუთი მასწავლებელი ახსნა-განმარტების გარეშე გაათავისუფლა. დირექტორმა მასწავლებლებს გათავისუფლების მიზეზად ჯერ მინისტრის ბრძანებულება დაუსახელა, ხოლო მას შემდეგ, რაც პედაგოგებმა ახალ დირექტორს შაშკინის ბრძანებულების გაცნობა მოსთხოვეს, უკან დაიხია და აღნიშნა, რომ ეს მისი პირადი გადაწყვეტილება იყო.

მასწავლებლები ამბობენ, რომ ისინი საპენსიო ასაკის გამო გაათავისუფლეს, თუმცა იქვე პრეზიდენტის განცხადებას იშველიებენ, რომელშიც მიხეილ სააკაშვილი ამტკიცებს, რომ პენსიაზე მყოფი მასწავლებლები მანამ დარჩებიან სამუშაო ადგილებზე, სანამ თვითონ არ წავლენ სახლებში.

სამსახურიდან  გათავისუფლებული პედაგოგების – დუნია ყალიჩავას, ბედიშა მებონიას, როენა კვარაცხელიას, ნონა ესებუას და ვარდო დადვანის – ადგილზე დირექტორმა სკოლის სასწავლო ნაწილის ნათესავები დანიშნა. დირექტორს და მის მოადგილეს ნეპოტიზმში გათავისუფლებული ოთხივე მასწავლებელი ადანაშაულებს.

პედაგოგები დირექტორმა სასწავლო წლის დაწყებიდან ორი კვირის შემდეგ გაათავისუფლა. ხუთივე მასწავლებელი დამსახურებული პედაგოგია, სკოლიდან მათ წასვლას სინანულით შეხვდნენ მოსწავლეები და მშობლები. გათავისუფლებული პედაგოგებიდან ერთ-ერთი 75 წლის ბედიშა მებონია ჭკადუაშის სკოლას 48 წელი ემსახურებოდა.