თბილისი, 4 ოქტომბერი, საქინფორმი. სოციალური ქსელების აქტიური მომხმარებლები ბოლო დროს ხშირად აწყდებიან ინფორმაციებს სხვადასხვა საპროტესტო აქციის დაგეგმვის თაობაზე. სოციალურ ქსელ „facebook“-ზე მორიგი საპროტესტო აქცია დაიგეგმა. ამჯერად უცნობი ორგანიზატორები საზოგადოებას 2011 წლის 23 ნომებერს, 13:00, შეკრებისკენ მოუწოდებენ, რათა, მათივე განმარტებით, „ვარდების რევოლუციის“ წინააღმდეგ ცოცხალი ჯაჭვი შეკრან“.

„ვისაც არ მოგწონთ ხალხის სოციალური ტერორი, გამოდით 23 ნოემბერს. ვისაც არ მოგწონთ ელიტური ჩინოვნიკების მიერ ქვეყნის ძარცვა მრავალმილიონიანი ტენდერებით, ვისაც არ მოგწონთ ფულის გასათეთრებლად მილიარდების ხარჯვა სამხედრო მიზნებით ჩვენი ქვეყნის ბიუჯეტიდან, ხელოვნური ფასების მატებები სასიცოცხლო პროდუქტებზე, ნავთობზე, ენერგომატარებლებზე, ხალხის მასობრივი დატერორება და მათთვის ერთადერთი საარსებო წყაროს წართმევა – როგორც ეს მათ „მარშრუტკის“ მძღოლებს, გარემოვაჭრეებს და სხვებს გაუკეთეს; ვისაც არ მოგწონთ ქვეყანაში „ფასადური“ დემოკრატია; ვისაც არ მოგწონთ ელექტროენერგიის დახარჯვაზე დასუფთავების გადასახადის მიბმა; წყალზე უგულავა „გველეშაპის“ დაჯდომა, რომელიც ბიზნესებს კუბურ მეტრში 4.80-ს ახდევინებს და მალე მოსახლეობასაც მიდგებიან; ვისაც არ მოგწონთ ახალ-ახალი გამრიცხველიანების სისტემები გამიზნული ხალხისათვის საარსებო საშუალებების წასართმევად; ვისაც არ მოგწონთ ერის რეკეტი; ვისაც არ მოგწონთ გარყვნილების და სოდომიზმის პროპაგანდა ქვეყანაში, განათლების სისტემის სრული დეგრადაცია; ვისაც არ მოგწონთ რობერტ სტურუას გათავისუფლება და თავისუფალი აზრის დევნა; ვისაც რამე არ მოგწონთ – გამოდით და დააფიქსირეთ თქვენი პროტესტი!“, – ნათქვამია აქციის ორგანიზატორების მიერ გავრცელებული მოწოდების ტექსტში.