თბილისი, 29 სექტემბერი, საქინფორმი. სახელმწიფო საკუთრებაში არსებულ მიწებზე მიმდინარე უნებართვო მშენებლობების ნაწილს დემონტაჟი ემუქრება. შესაბამისი ცვლილება „ტექნიკური საფრთხის კონტროლის შესახებ“ კანონში შედის. კანონპროექტის მიხედვით, სახელმწიფო ან/და თვითმმართველი ერთეულის საკუთრებაში არსებულ მიწის ნაკვეთებზე მიმდინარე უნებართვო მშენებლობის დემონტაჟის დადგენილებას მაშინ გამოცემენ, თუ მშენებლობის მწარმოებელი პირი დაუდგენელი იქნება. აღნიშნული დადგენილების გასაჩივრება კი დემონტაჟის გადაწყვეტილებას ვერ შეაჩერებს. კანონპროექტის ავტორები და ინიციატორები არიან დეპუტატები ანდრო ალავიძე, ვახტანგ ბალავაძე და კახაბერ ანჯაფარიძე.

კანონპროექტის მიხედვით, თუ პირი ექვს თვეში მშენებლობის ნებართვას არ აიღებს, სახელმწიფო ზედამხედველობის ორგანო მას „დარღვევის“ გამოსასწორებლად გონივრულ ვადას მისცემს. ხოლო იმ შემთხვევაში, თუ პირი ამ „გონივრულ ვადაში“ ვერ ჩაეტევა, მას ყოველ ვადაგადაცილებულ დღეზე ჯარიმა დაეკისრება, რომელიც მის საკუთრებაში არსებული ქონების საერთო ფართობის თითოეულ კვადრატულ მეტრზე 0,1 ლარიდან 1 ლარის ფარგლებში იმერყევებს.