თბილისი, 17 სექტემბერი, საქინფორმი. გორში დავით აღმაშენებლის სახელობის საქართველოს ეროვნული თავდაცვის აკადემია გაიხსნა.

ღონისძიებაზე სიტყვით გამოსვლისას მიხეილ სააკაშვილმა 2008 წლის აგვისტოს ომი გაიხსენა, როცა რუსეთის ჯარისკაცებმა ამ ტერიტორიაზე არსებული ბაზები მთლიანად გაანადგურეს.

თავდაცვის სამინისტროს ინფორმაციით, განახლებული ეროვნული თავდაცვის აკადემიის კომპლექსში შედის საცხოვრებელი კორპუსები, სასადილო, საკონფერენციო, გასართობი ცენტრი, სასპორტო დარბაზები, აუზი, ღია და დახურული ტიპის სასპორტო მოედნები, სასწავლო კორპუსები, ბიბლიოთეკა, ლაზარეთი და ადმინისტრაციის შენობა. მსმენელები უზრუნველყოფილნი არიან თანამედროვე სტანდარტების შესაბამისი მატერიალურ-ტექნიკური ბაზით, საცხოვრებელი ადგილით, კვებით, უნიფორმით, სამედიცინო მომსახურებით. აკადემიის კურსდამთავრებული იღებს ბაკალავრის ხარისხს და ლეიტენანტის სამხედრო წოდებას. აკადემია მოამზადებს ოფიცრებს ქვეითი, საინჟინრო, ლოგისტიკის, სატანკო, მექანიზებული, არტილერიის, ავიაციის, საჰაერო თავდაცვისა და კავშირგაბმულობის სპეციალიზაციით.

აკადემიის საბაკალავრო პროგრამები ხორციელდება ორი სკოლის მეშვეობით: ტექნიკურ მეცნიერებათა სკოლა – აეროდრომებისა და საავტომობილო გზების მშენებლობა, საინფორმაციო ტექნოლოგიები; ბიზნესისა და მართვის სკოლა – ზოგადი მენეჯმენტი, ლოგისტიკა და ექსპედირება.

აკადემიას ექნება სამაგისტრო სასწავლო განყოფილებაც. დაგეგმილია მსმენელებისთვის გაცვლითი პროგრამები პარტნიორი ქვეყნების საერთაშორისო დონეზე აღიარებულ უმაღლეს სასწავლებლებთან.

აკადემიაში სწავლა სრულად ფინანსდება საქართველოს თავდაცვის სამინისტროს მიერ.

დავით აღმაშენებლის სახელობის თავდაცვის ეროვნული აკადემია 1993 წლის 28 მაისს დაარსდა. საქართველოს მთავრობის 2010 წლის 8 დეკემბრის დადგენილებით, თავდაცვის ეროვნული აკადემიის ბაზაზე შეიქმნა სსიპ „დავით აღმაშენებლის სახელობის საქართველოს ეროვნული თავდაცვის აკადემია“, რომელიც საქართველოში ერთადერთი უმაღლესი სამხედრო სასწავლებელია.