საზოგადოება
თელავის რაიონის სოფელ ართანაში სასმელ წყალს ხვლიკები მოჰყვება
თბილისი. 17 სექტემბერი. საქინფორმი. კახეთის საინფორმაციო ცენტრის ინფორმაციით, სოფელ ართანაში ორი ჭაბურღილი და მთის ორი წყაროა, თუმცა ყველა მათგანი დაბინძურებულია. „კომუნისტების დროს გაუქმებული წყლის სათავე ნაგებობა ისევ აამუშავა სოფლის რწმუნებულმა და ონკანში ხვლიკები იჩხირება, წყალს ლოკოკინები და ჭიებიც მოსდევს. ნაგავსაყრელთან ადრე კოლმეურნეობამ ერთი ლაფეტი შხამქიმიკატი ჩაყარა. იქვე იყო ღორების ფერმა და წუმპე. ამ ადგილზე ახლა ჭაბურღილია გაკეთებული. სოფლის რწმუნებულს რომ ვუთხარით, აქ ჭაბურღილის გაკეთება არ შეიძლებოდა, გვითხრა – შენ ნუ დალევო. რაც ეს ჭაბურღილი გააკეთეს, სოფელში ხალხი კიბოთი იხოცება. ეს ამბავი შესასწავლია. წყალი კარგად უნდა შემოწმდეს“, – აცხადებს ადგილობრივი მოსახლეობა, რომლის მტკიცებით, სოფელში ხშირია დიზენტერიის შემთხვევებიც.
სოფელ ართანას ტერიტორიული ორგანოს რწმუნებული რამინ კომშიაშვილი კი აცხადებს, რომ კომუნისტების დროს გაკეთებული წყლის სათავე ნაგებობიდან წყალს ყველა ოჯახი იღებს. „წყალდიდობისას მდინარე დიდხევმა გადაუარა დრენაჟს, საიდანაც წყალი მიდის რეზერვუარამდე. დაილექა და მღვრიე წყალი წამოვიდა. განცხადებები გვაქვს გამოკრული, რომ უნდა გავწმინდოთ სასმელი წყლის სათავე ნაგებობა. სპეციალისტებს შევამოწმებინეთ და თქვეს, რომ მთის ორივე წყალი სასმელად ვარგისია. რაც შეეხება ჭაბურღილს, 88 მეტრიდან ამოდის წყალი და არანაირი სიბინძურე არ არის“, – განმარტა კომშიაშვილმა. 
