საქართველო, 5 მაისი, საქინფორმი. 2025 წელს აზარტული თამაშების ბიზნესიდან შემოსავალმა 1,8 მლრდ ლარი შეადგინა, რაც 2024 წლის მაჩვენებელთან შედარებით 12,5%-ით მეტია, განაცხადა ფინანსთა მინისტრი მოადგილე მიხეილ დუნდუამ მედიაპლატფორმა BMG-ის ეთერში.

სათამაშო ბიზნესის მფლობელებისთვის საგადასახადო განაკვეთი 2025 წლის 1-ელი იანვრიდან გაიზარდა. გადასახადების ზრდა დაკავშირებულია სათამაშო ბიზნესის სფეროში არსებული არათანაბარი საგადასახადო პირობების აღმოფხვრის სურვილთან, რადგანაც მანამდე მოქმედი საგადასახადო სისტემა დისბალანსს ქმნიდა აზარტული თამაშების ორგანიზებით დაკავებულ ფიზიკურ პირებსა და ორგანიზაციებს შორის.

„რაც შეეხება ფისკალურ ეფექტს, 2025 წელს 1,8 მლრდ ლარის შემოსავალი შემოვიდა სათამაშო ბიზნესიდან [ბიუჯეტში], რაც 200 მლნ ლარზე მეტით გაზრდილია 2024 წელთან შედარებით. თუ შევადარებთ, მაგალითად, ხუთწლიან პერსპექტივას, ეს მაჩვენებელი დაახლოებით ხუთჯერაა გაზრდილი ხუთწლიან პერსპექტივაში”, - განაცხადა დუნდუამ.

მისი თქმით, ფისკალური თვალსაზრისით აღნიშნულ სექტორში გადასახადების გაზრდა აბსოლუტურად გამართლებულია.

ასევე, დუნდუას თქმით, ამ სექტორში არალეგალური ოპერატორებისა და ვებგვერდების რაოდენობა უმნიშვნელოა.

„ბუნებრივია, შეიძლება ჰქონდეს ადგილი ისეთი გზების ძიებას ცალკეულ შემთხვევებში, რომ თავი აარიდოს ბიზნესმა [გადასახადების გადახდას], მაგრამ ამ შემთხვევაში, ბუნებრივია, ზარალდება თვითონ ასეთი ქმედების ჩამდენი პირი და შესაბამისად, ჩვენ ჯარიმებიც გაზრდილი გვაქვს ამ მიმართულებით", - განაცხადა დუნდუამ.

საგადასახადო კოდექსში შეტანილი ცვლილებების თანახმად, ფიზიკური პირის მიერ სათამაშო აპარატების სალონის მოწყობიდან ან/და სისტემურ-ელექტრონული ფორმით აზარტული თამაშობების ორგანიზებიდან მიღებული დასაბეგრი შემოსავალი, ნაცვლად 15%-იანი განაკვეთისა, იბეგრება 20%-იანი განაკვეთით.

თუმცა, ეს არ ეხება შემოსავლებს, რომლებიც მიღებულია სისტემურ-ელექტრონული ფორმით მოწყობილ აზარტულ თამაშებში უცხოელი მოქალაქეების მონაწილეობის შედეგად.

სისტემურ-ელექტრონული ფორმით ორგანიზებულ აზარტული თამაშობები - ისეთი თამაშობებია, სადაც მოთამაშეების ფსონების და პროგნოზების ფიქსაცია ინფორმაციის შემნახველი ელექტრონული მოწყობილობების დახმარებით ხორციელდება.

გარდა ამისა, მოგების გადასახადის განაკვეთი 15%-დან 20%-მდე გაიზარდა სათამაშო აპარატების სალონის მოწყობისა ან/და სისტემურ-ელექტრონული ფორმით აზარტული თამაშების ორგანიზებისთვის, გარდა უცხო ქვეყნის მოქალაქეების მონაწილეობით ონლაინ აზარტული თამაშებისა. თუმცა, ესეც არ ეხება მოგებას, რომელიც უცხოელი მოქალაქეების მონაწილეობის შედეგად არის მიღებული.

ამასთან, 2025 წლიდან 20%-იანი საშემოსავლო გადასახადის გადამხდელები თავისუფალი არიან დივიდენდებზე 5%-იანი გადასახადის გადახდისგან.