ზუგდიდი. 16 სექტემბერი. საქინფორმი. ზუგდიდის რაიონულმა სასამართლომ 17 წლის ნიკა დაგარგულიას საქმეზე არსებითი განხილვა გუშინ დაიწყო. ბრალდებულის მიმართ საქმე სისხლის სამართლის კოდექსის 178-ე მუხლის მე-2 ნაწილის „ბ“ პუნქტითა და 117-ე მუხლის პირველი ნაწილით არის აღძრული. ეს მუხლები კი ძარცვასა და ჯანმრთელობის განზრახ მძიმე დაზიანებას გულისხმობს.

ბრალდებულმა გუშინდელ სხდომაზე ძარცვის ფაქტი აღიარა, მაგრამ ჯანმრთელობის განზრახ მძიმე დაზიანების ფაქტთან დაკავშირებით განმარტა, რომ უდანაშაულოა. ნიკა დაგარგულია სამართალდამცველებმა მოქალაქე ალისა ჩხაპელიასთვის ოქროს ყელსაბამის ძარცვის გამო აიყვანეს. როგორც დაკავებულის დედა შვილის ნაამბობიდან გამომდინარე განმარტავს, დაკითხვის დროს მასზე ზუგდიდის პოლიციის სამმართველოს 6 პოლიციელი ძალადობდა. „ცემისგან ჩემმა შვილმა გონება დაკარგა, რა დროსაც პოლიციელ კოხტა კოდუას უთქვამს „ვიხმაროთო“, რაც ნიკას ჩაესმა. ჩემი შვილი ამხტარა და კოდუასთვის მუშტი სახეში გაურტყამს. ის წაქცეულა და თავი მაგიდას ჩამოარტყა“, – ამბობს ლალი ბენდელიანი.

ნიკა დაგარგულია სპორტსმენია. კოხტა კოდუა სასწრაფო დახმარების მანქანით გადაიყვანეს საავადმყოფოში. მას მრავლობითი დაზიანებები ჰქონდა.  ნიკა დაგარგულიას მიერ პოლიციელ კოხტა კოდუას ცემის ფაქტი საქმის მასალებში ფიგურირებს, თუმცა გაუპატიურების მცდელობასა და ბრალდებულის ცემაზე არაფერია ნათქვამი.

სასამართლომ გუშინდელ სხდომაზე მხოლოდ ერთი მოწმე – პოლიციელი ირაკლი გვიჩიანი, დაკითხა, რომელმაც დაგარგულია დააკავა 24 ივნისს. პროკურატურამ სხვა მოწმეები ვერ წარმოადგინა.

პროკურორ ლევან საჯაიას თქმით, კოხტა კოდუა თბილისში მივლინებით იმყოფება. დაზარალებული ალისა ჩხაპელია კი დასასვენებლად არის წასული. მოწმეების გამოუცხადებლობის გამო სასამართლო სხდომა დასრულდა და ის 28 სექტემბერს განახლდება.