კახეთი. 12 სექტემბერი. საქინფორმი. „კარგად ორგანიზებული რთველისა“ და „სწორად შემუშავებული გეგმის“ მიუხედავად, რაზეც გასულ კვირას საქართველოს პრეზიდენტი მიხეილ სააკაშვილი კახეთში სტუმრობისას საუბრობდა, მევენახეებს ყურძნის ჩაბარებაზე პრობლემა მაინც შეექმნათ. კახეთის საინფორმაციო ცენტრის ინფორმაციით, ორი დღეა, წნორის ღვინის ქარხანასთან 15 სატვირთო ავტომობილია გაჩერებული. გლეხების ყურძნით დატვირთული მანქანებიდან წვენი იღვრება, თუმცა კომპანია „გრუზვინპრომი“ ნედლეულს არ იბარებს. მას შემდეგ, რაც ადგილობრივი მედიის წარმომადგენლები ქარხანაში მივიდნენ, მწარმოებლებმა ყურძნის მიღება დაიწყეს, თუმცა ჟურნალისტების წამოსვლის შემდეგ შეწყვიტეს. მიზეზად კი იმ გარემოებას ასახელებენ, რომ გლეხებს შერეული ყურძენი მიაქვთ, არადა, მევენახეებს ორმაგი გარჯა უწევთ – ყურძნის ორ ჯიშს ცალ-ცალკე კრეფენ. ქარხანა მათ ამავე მიზეზით ყურძნის 40-ის ნაცვლად, 20 თეთრად ჩაბარებას სთავაზობს, რაც გლეხებისთვის ზარალია.

ერთ-ერთი ტრადიციული პიარკამპანიის დროს პრეზიდენტმა სააკაშვილმა აღნიშნა, რომ „ყურძნის უხვი მოსავლიდან გამომდინარე, გასულ წლებთან შედარებით, წელს უფრო მაღალი ეკონომიკური ეფექტია მოსალოდნელი“, თუმცა კახელებს „ფიცი სწამთ, ბოლო აკვირვებთ“, რადგან მათი შრომა წნორის ღვინის ქარხანასთან „იღვრება“.