თბილისი. 9 სექტემბერი. საქინფორმი. სკანდალური საიტი „WikiLeaks“ საქართველოს შესახებ მორიგ მასალებს აქვეყნებს, რომლებიც 2009 წლის აპრილ-ივნისის საპროტესტო აქციებს ეხება.

„4 ივნისისთვის პროტესტი შესუსტებულია და, როგორც ჩანს, მუხტს კარგავს“, – ამის შესახებ საქართველოში აშშ-ის მაშინდელი ელჩის, ჯონ ტეფტის, 2009 წლის 5 ივნისით დათარიღებულ დიპლომატიურ გზავნილშია აღნიშნული. დოკუმენტში ელჩი არასაპარლამენტო ოპოზიციონერ ლიდერ ირაკლი ალასანიასთან შეხვედრის შესახებაც წერს, რომელიც ორგანიზაციის – „ალიანსი საქართველოსთვის“, ლიდერის ინიციატივით გაიმართა.

„შეხვედრისას ალასანიამ დაადასტურა, რომ ლევან გაჩეჩილაძე ესაუბრება ხელისუფლებას. ალასანიას ცნობით, გაჩეჩილაძემ უთხრა, რომ თავად პრეზიდენტი მიხეილ სააკაშვილი არის მზად მასთან, როგორც პრემიერ-მინისტრის პოტენციურ კანდიდატთან, შესახვედრად. ალასანია მხარს უჭერს მოლაპარაკებებს. გაჩეჩილაძის მზადყოფნა – ზოგიერთ არასაპარლამენტო ლიდერთან ერთად კომპრომისის რეალისტური სცენარი განიხილოს, მცირე, მაგრამ საყურადღებო გამოვლინებაა“, – აღნიშნავს ელჩი საკუთარ გზავნილში.