თბილისი, 8 სექტემბერი, საქინფორმი. „HSBC Bank Georgia“-ს განცხადებით,  ბრიტანული ბანკი „HSBC“ საქართველოს 2012 წლის დასაწყისში დატოვებს, რაც ბანკის იმ სტრატეგიის ნაწილია, რომლის ფარგლებშიც იგი იმ ბაზრებიდან გასვლას გეგმავს, სადაც საბანკო საქმიანობას მცირე მასშტაბით ეწევა.

„HSBC-საქართველო“ მომხმარებლებს სთავაზობდა საბანკო მომსახურების არასრულ სპექტრს და მიუხედავად ქვეყანაში გატარებული მნიშვნელოვანი ღონისძიებებისა, ვთვლით, რომ ამჟამად დადგა ბაზრიდან გასვლის დრო. იმისათვის, რომ პროცესი უმტკივნეულოდ წარიმართოს, ბანკი უზრუნველყოფს სწორი და დროული ინფორმაციის მიწოდებას მარეგულირებელი ორგანოსთვის, ბანკის თანამშრომლებისა და მომხმარებლებისათვის. მინდა, ვისარგებლო შემთხვევით და მადლობა გადავუხადო ჩემს კოლეგებს საქართველოში მათი ძალისხმევისა და საქმისადმი ერთგულებისთვის“, – განაცხადა „HSBC Bank Georgia“-ს გენერალურმა დირექტორმა გაი ლუისმა.

ბანკმა ხაზი გაუსვა, რომ საქართველოს ბაზრიდან გასვლის გადაწყვეტილება არის პოლონეთისა და რუსეთის საცალო ბიზნესის დახურვის ლოგიკური გაგრძელება.

შეგახსენებთ, „HSBC“-მ საქართველოში საბანკო საქმიანობა 2008 წლის ივნისიდან დაიწყო. რუსთაველის გამზირზე განთავსებული ბანკის ცენტრალური ოფისი, ძირითადად, კორპორატიულ საბანკო მომსახურებაზე იყო ფოკუსირებული.

ბანკმა დახურვის პროცესი უკვე დაიწყო, შეაჩერა რა ახალი კლიენტების მიღება. თუმცა არსებულ მომხმარებლებს ბანკი გაუწევს სრულ საბანკო მომსახურებას საკონტრაქტო ვალდებულებების შესაბამისად. ბანკის საბოლოოდ დახურვა დაგეგმილია 2012 წლის დასაწყისისთვის.