თბილისი. 7 სექტემბერი. საქინფორმი. საკანონმდებლო ინიციატივა, რომლის მიღების შემდეგ მთავრობას საქართველოს რკინიგზის, ელექტროსისტემის და მაგისტრალური გაზსადენის აქციების გასხვისების მიზნით საერთაშორისო საფონდო ბირჟებზე გატანა შეეძლება, პარლამენტში უკვე ინიცირებულია. საკანონმდებლო პროექტი დეპუტატებმა ზვიად კუკავამ და მიხეილ ცქიტიშვილმა მოამზადეს. მათ მიერ ინიცირებული საკანონმდებლო ინიციატივა სწორედ წილებისა და აქციების პროვატიზებასთან, მათ შორის წილებისა და აქციების საერთაშორისო საფონდო ბირჟებზე გატანის ფორმებთან დაკავშირებულ საკითხებს არეგულირებს.

როგორც ცნობილია, მთავრობამ საქართველოს რკინიგზის, ელექტროსისტემისა და მაგისტრალური გაზსადენის აქციების საერთაშორისო ბირჟებზე გატანის გადაწყვეტილება მიიღო, რაც დაახლოებით, ერთი თვის წინ მთავრობის სხდომაზე გახდა ცნობილი. მაშინ პრემიერ-მინისტრმა ნიკა გილაურმა განმარტა, რომ ხელისუფლება ვარშავის, ლონდონის, ნიუ-იორკის ბირჟებზე აქციების მხოლოდ 20-25 %-ის გატანას გეგმავდა. მთავრობის მეთაურმა ისიც აღნიშნა, რომ ეს გადაწყვეტილება კანონში ცვლილებების შეტანას მოითხოვდა, რადგან მოქმედი რეგულაციები აქციების საერთაშორისო ბირჟემზე გატანას ხელს უშლიდა.