თბილისი, 7 სექტემბერი, საქინფორმი. აფხაზეთის ხელისუფლების წარმომადგენელთა განცხადებით, რეგიონის ახლად არჩეული ლიდერის, ალექსანდრე ანქვაბის, ინაუგურაცია 26 სექტემბერს მოკრძალებულად ჩატარდება. ეს უკავშირდება მისი წინამორბედის – სერგეი ბაგაფშის, გარდაცვალებას, რის გამოც ვადამდელი საპრეზიდენტო არჩევნები ჩატარდა მომხდარიდან სამი თვის თავზე – 26 აგვისტოს.

„ალექსანდრე ანქვაბი საჭიროდ მიიჩნევს, რომ ეს პროცედურა ჩატარდეს მოკრძალებულად, განსაკუთრებული საზეიმო ღონისძიებების გარეშე. ამიტომ ამჯერად ინაუგურაციაზე სტუმრებს არ მოიწვევენ“, – განაცხადა აფხაზეთის ხელისუფლების ოფიციალურმა წარმომადგენელმა კრისტიან ბჟანიამ.