თბილისი, 5 სექტემბერი, საქინფორმი. ევროკავშირის სპეციალური წარმომადგენელი სამხრეთ კავკასიასა და საქართველოს კრიზისის საკითხში ფილიპ ლეფორტი ახალი თანამდებობის რანგში პირველი ოფიციალური ტურნეს ფარგლებში აზერბაიჯანში იმყოფება.

როგორც მან ჟურნალისტებს განუცხადა, ევროკავშირი სამხრეთ კავკასიის ქვეყნებთან თანამშრომლობას უდიდეს მნიშვნელობას ანიჭებს. ევროკავშირი საქართველოში, აზერბაიჯანსა და სომხეთში კონფლიქტების მოგვარების თვალსაზრისით მუშაობის გაგრძელებას აპირებს.

„სწორედ ეს არის მიზეზი, რის გამოც მე გადავწყვიტე, ამ სამი ქვეყნის დედაქალაქებს ვეწვიო“, – განაცხადა ლეფორტმა.

აზერბაიჯანული პრესის ინფორმაციით, ლეფორტი ბაქოს შემდეგ თბილისსა და ერევანსაც ეწვევა, სადაც, ასევე, უმაღლესი რანგის შეხვედრებს გამართავს.

როგორც ცნობილია, ლეფორტმა 26 აგვისტოს ზემოხსენებულ თანამდებობაზე პიტერ სემნები შეცვალა.

ფილიპ ლეფორტი, რომელსაც დიპლომატიურ სამსახურში 20-წლიანი გამოცდილება აქვს, 2004-2007 წლებში საფრანგეთის ელჩი იყო საქართველოში, ხოლო 2007-2010 წლებში რუსეთში საფრანგეთის ელჩის მოადგილედ მსახურობდა. 2010 წლიდან იგი საფრანგეთის საგარეო საქმეთა სამინისტროს კონტინენტური ევროპის გენერალურ დირექტორატს ხელმძღვანელობდა.