საზოგადოება
დიდ დიღომს რაგბის ახალი მოედანი ექნება
თბილისი, 3 სექტემბერი, საქინფორმი. რაგბის კავშირი საქართველოს განათლებისა და მეცნიერების სამინისტროს მხარდაჭერით რაგბის სტანდარტულ მოედანს და მოზარდების სავარჯიშოდ განკუთვნილ რაგბის სტადიონს აშენებს. თბილისის 186-ე საჯარო სკოლის ტერიტორიაზე მშენებარე თანამედროვე სპეციალიზებული რაგბის სპორტული კომპლექსი ერთადერთია დიდი დიღმის დასახლებაში. იგი რაგბით დაინტერესებულ ყველა მოზარდს მოემსახურება.
დიდი დიღმის სკოლებში პრეზიდენტის ინიცირებულმა პროექტმა ფიზკულტურის სპორტის გაკვეთილებით ჩანაცვლების თაობაზე, დიდი დაინტერესება გამოიწვია. მოსწავლეები კალათბურთით, ფეხბურთით, ფრენბურთით, ცურვითა და წყალბურთით არიან დაინტერესებულნი. სურვილის შემთხვევაში, მომავალში მათ რაგბის სტადიონზე სპორტის ამ სახეობაშიც ჩაუტარდებათ გაკვეთილები. თანამედროვე კომპლექსი რაგბის პოპულარიზაციასა და განვითარებას შეუწყობს ხელს. 
