ზუგდიდი, 2 სექტემბერი. საქინფორმის კორ. კოტე ესართია. ზუგდიდის მუნიციპალიტეტის გამგეობა სოციალურად დაუცველთა ტრანსპორტით მგზავრობისთვის გამოყოფილ თანხებს თვითნებურად ანაწილებს. ზუგდიდის 2011 წლის ბიუჯეტში სოციალურად დაუცველი მოსახლეობისთვის მუნიციპალური ტრანსპორტით მგზავრობისას თანადაფინანსებისთვის 10 ათასი ლარია გამოყოფილი. თუმცა ამ თანხიდან არცერთი თეთრი ამ დრომდე არ გახარჯულა და სოციალურად დაუცველები მუნიციპალური ტრანსპორტით უშეღავათოდ სარგებლობენ.

ზუგდიდის გამგეობამ სოციალურად დაუცველი მოსახლებისთვის გამოყოფილი 10 ათასი ლარის ბედი უკვე გადაწყვიტა. ის მათ ნაცვლად სოფელ ხურჩისთვის ტრანსპორტის გამოყოფას მოხმარდება. თუმცა გამგებლის პირველი მოადგილე რუსლან კილასონია ვერ აკონკრეტებს, კერძოდ, რას მოხმარდება აღნიშნული თანხა.

გამგებლის მოადგილის თქმით, ამ საკითხთან დაკავშირებით ჯერჯერობით სამუშაოები მიმდინარეობს. საბიუჯეტო თვის დასრულებამდე ოთხი თვე დარჩა, თუმცა რუსლან კილასონიამ ის იცის, როდის გამოეყოფა კონფლიქტისპირა სოფელ ხურჩას ტრანსპორტი. გამგებლის მოადგილე ვერც იმ ფაქტს ხსნის, სოციალურად დაუცველთა ხარჯზე ხურჩას რატომ უნდა გაეწიოს დახმარება, როცა ამისთვის სოფელს ცალკე სუბსიდია „სოფლის მხარდაჭერის პროგრამის“ სახით უკვე აქვს და გამოყოფილი თანხის განკარგვა თავად შეეძლო.