საქართველო, 19 სექტემბერი, საქინფორმი. მასობრივი მშვიდობიანი საპროტესტო აქციის მშვიდობიან გადატრიალებასთან გაიგივება 4 ოქტომბერს, ადგილობრივი არჩევნების დღეს - ეს არის ოქსიმორონი და საჩუქარია მმართველი პარტიისთვის, განაცხადა პარტია „საქართველოსთვის“ ლიდერმა და საქართველოს ყოფილმა პრემიერ-მინისტრმა გიორგი გახარიამ ტელეარხ Formula-ს ეთერში.

საქართველოში ადგილობრივი არჩევნები 4 ოქტომბერს გაიმართება. ოპოზიციური სპექტრის ნაწილი, მათ შორის ყოფილი მმართველი პარტია „ერთიანი ნაციონალური მოძრაობა“, მათ ბოიკოტს უცხადებს... ოპოზიციის რამდენიმე ლიდერმა მშვიდობიანი გადატრიალება და ხელისუფლების შეცვლა უკვე 4 ოქტომბერს დააანონსა.

„მასობრივი მშვიდობიანი აქცია უნდა დაიბრენდოს, როგორც მშვიდობიანი დამხობა და დაინიშნოს მაინცდამაინც არჩევნების დღეს?! ეს არის ლოგიკა? მშვიდობიანი დამხობა ოქსიმორონია, საერთოდ“, - ამბობს გიორგი გახარია.

გახარიას თქმით, მშვიდობიანი პროტესტის გადატრიალებასთან გაიგივება ეს არის პროტესტის დელეგიტიმაცია და მმართველი პარტია „ქართული ოცნების“ ლეგიტიმაცია... მისი თქმით, ეს არის ოპოზიციის ლიდერების უპასუხისმგებლობის კიდევ ერთი მაგალითი იმ ადამიანების მიმართ, რომლებიც ყოველდღე სამსახურიდან შემდეგ რუსთაველის გამზირზე მიდიან.

„მეგობრებო, ეს აღარ არის უკვე თამაში, ეს არის ჩვენი ქვეყნის შემდეგი 10 წლის განმსაზღვრელი პროცესები“, - განაცხადა გახარიამ.

მისი თქმით, ამ არჩევნებში არის ერთადერთი მიზანი - „ოცნების“ რეალური 35% შემცირდეს 20%-მდე. „ეს თუ არ მოხდა, ყველანაირი საუბრები ასეთ გადატრიალებაზე... ეს არის ჩვეულებრივი საბავშვო ბაღი, ილუზია, უპასუხისმგებლობა“, - ამბობს გიორგი გახარია.

როგორც ადრე გახარიას პარტიის წევრმა ლევან გოგიჩაიშვილმა განაცხადა, ისინი მონაწილეობენ არჩევნებში, მაგრამ არა 4 ოქტომბრის საპროტესტო აქციაში.