საქართველო, 30 ივლისი, საქინფორმი. 2025 წლის იანვარ-ივლისში თბილისში ბინებზე მოთხოვნა 2024 წლის ანალოგიურ პერიოდთან შედარებით 3,6%-ით გაიზარდა, ნათქვამია საინვესტიციო კომპანია Galt & Taggart-ის კვლევაში.

ანალიტიკოსების ინფორმაციით, მიმდინარე წლის პირველ ნახევარში საქართველოს დედაქალაქში 1,5 მლრდ დოლარის ღირებულების (+5,6% 2024 წლის ანალოგიურ პერიოდთან შედარებით) 19,1 ათასი ბინა გაიყიდა.

რაც შეეხება მხოლოდ ივნისის მონაცემებს, თბილისში 3,3 ათასი ბინა გაიყიდა, რაც გასული წლის ივნისთან შედარებით 10,3%-ით მეტია. მეორად ბაზარზე გაყიდვები 17,1%-ით , ხოლო პირველად ბაზარზე 2,9%-ით გაიზარდა.

2025 წლის ივნისში, პირველად ბაზარზე კვადრატული მეტრის საშუალო ფასი წინა თვესთან შედარებით 0,5%-ით გაიზარდა და 1.338 დოლარი შეადგინა. გარდა ამისა, მეორად ბაზარზე ახალ პროექტებში (რომლებიც 2013 წლიდან გაცემული ნებართვებით აშენდა), ფასი წინა თვესთან შედარებით 0,2%-ით გაიზარდა და 1.256 დოლარი შეადგინა.

ბაზრის კვლევის თანახმად, 2025 წლის ივნისში თბილისში საშუალო ზომის ბინის (50-60 კვ.მ) ყოველთვიური ქირა უმნიშვნელოდ, 1,2%-ით გაიზარდა და კვადრატულ მეტრზე 9,4 დოლარს მიაღწია.

2025 წლის იანვარ-ივნისში ყველაზე მეტი ბინა გაიყიდა დიდი დიღმის, საბურთალოსა და სამგორის რაიონებში, ხოლო ყველაზე ნაკლები - ჩუღურეთის, მთაწმინდისა და ვაშლიჯვრის რაიონებში.