თბილისი, 25 აგვისტო, საქინფორმი. ენერგოსადისტრიბუციო კომპანია ვალდებულია, აბონენტებს ქვითარი სახლში მიაწოდოს, რასაც ის არ აკეთებს. „კახეთის საინფორმაციო ცენტრმა“ დღეს გურჯაანისა და დედოფლისწყაროს სერვისცენტრებში რაიონის სოფლებში მცხოვრები 60 აბონენტი გამოკითხეს, რომელთაგან 56 მომხმარებელს კომპანიისგან ქვითარი საერთოდ არ მიუღია, 3-მა მომხმარებელმა აღნიშნა, რომ ქვითარი მაღაზიაში დაუტოვეს, საიდანაც თავად წაიღეს, დარჩენილმა 1-მა აბონენტმა კი ქვითარი სახლში მიიღო.

სემეკის დადგენილებით განსაზღვრულია, რომ აბონენტმა მოხმარებული ელექტროენერგიის საფასური ქვითარში მითითებულ ვადაში უნდა გადაიხადოს, რომელიც არ უნდა იყოს 15 კალენდარულ დღეზე ნაკლები. ასევე, ქვითარში უნდა იყოს მითითებული დარიცხული თანხის გადახდის ვადა, ტარიფი, მოხმარებული ელენერგიის რაოდენობა, ადგილი, სადაც თანხის გადახდაა შესაძლებელი. მეორე მხრიდან ქვითარზე მითითებული უნდა იყოს პრეტენზიების განმხილველი სამსახურის მისამართი და საკონტაქტო ტელეფონები.

აბონენტების თქმით, ენერგოსადისტრიბუციო კომპანიას გადახდის მცოცავი გრაფიკი აქვს. კომპანია თანხის გადახდის ბოლო დღედ ყოველი თვის ხან 16, ხან 17 და ხანაც 19 რიცხვს აწესებს. ქვითრის უქონლობის გამო აბონენტები თანხის დროულად გადახდას ვერ ახერხებენ და მათ ერთი დღით ვადაგადაცილების შემთხვევაშიც კი ჯარიმას აკისრებენ.