თბილისი, 25 აგვისტო, საქინფორმი. როგორც „თავისუფალი დემოკრატების“ ერთ-ერთმა ლიდერმა, თბილისის საკრებულოს წევრმა ზურაბ აბაშიძემ განაცხადა, მოქალაქეებმა საფინანსო-საკრედიტო ბიუროსგან მიიღეს გაფრთხილება, რომ 1999-2002 წლებში მოხმარებული წყლის დავალიანება დაფარონ. აღნიშნული ფაქტი აბაშიძემ საფინანსო-საკრედიტო ბიუროს შენობასთან გააპროტესტა და შეეცადა, გაერკვია, ვის ეკუთვნის ეს ორგანიზაცია და რის საფუძველზე დაიანგარიშეს დავალიანება.

„როგორც საკრებულოს წევრმა, მოქალაქეებისგან მივიღე ინფორმაცია, რომ არსებობს ორგანიზაცია, რომელსაც ჰქვია „საფინანსო-საკრედიტო ბიურო“. ეს ორგანიზაცია 1999-2002 წლების წყლის დავალიანებას ითხოვს. ამ პერიოდში სასმელი წყალი იყო უფასო და, შესაბამისად, დავალიანება არავის ჰქონდა“, – განუცხადა ჟურნალისტებს აბაშიძემ, რომელმაც მედიის წარმომადგენლებს  შესაბამისი გამაფრთხილებელი დოკუმენტაციაც წარუდგინა.

აბაშიძე შეეცადა, თავად ბიუროს ხელმძღვანელობისთვის ეთხოვა საქმის ვითარებაში გარკვევა, თუმცა შენობის ეზოში მას მხოლოდ დაცვის წევრი დახვდა, რომელმაც საკრებულოს წარმომადგენელს აცნობა, რომ „ხელმძღვანელობა გასვენებაშია წასული და ამ დროისთვის ადგილზე კომპეტენტური პირი არ იმყოფება“.