საზოგადოება
რამაზ ჩხიკვაძე: „ხელოვნება ხელოვნებაა, საქმე საქმეა, პოლიტიკური გააზრება სულ სხვაა“

chxikvadze2თბილისი, 23 აგვისტო, საქინფორმი. რუსთაველის თეატრის მსახიობი რამაზ ჩხიკვაძე რობერტ სტურუას თანამდებობიდან გათავისუფლებას ჩეხეთიდან ეხმაურება, სადაც ის სამკურნალოდ იმყოფება. მას ეს ქმედება სამარცხვინოდ მიაჩნია და აღნიშნავს, რომ შეიძლება მსოფლიომ დაგვცინოს, ქართულ კულტურაში საქვეყნოდ აღიარებული რეჟისორის შემოქმედების ადგილი რომ არ აღმოჩნდა.

„ხელოვნება ხელოვნებაა, საქმე საქმეა, პოლიტიკური გააზრება სულ სხვაა. იმსჯელეთ, ბატონო, პოლიტიკურ მოსაზრებაზე, იმაზე, სწორია თუ არა ის, მაგრამ ხელოვნება აქ არაფერ შუაშია“, – აღნიშნა რამაზ ჩხიკვაძემ. მისივე თქმით, დასანანია, რომ რეჟისორს არ აკმარეს კრიტიკის ქარცეცხლში გატარება და მის ამდენი ხნის ნაღვაწსაც ხაზი გადაუსვეს, რადგან მსოფლიო კულტურის წარმომადგენლები სტურუას დიდ მაესტროთა შორის ასახელებენ.

„ქართველ ხალხს მივმართავ, არ დაიჯერონ ნათქვამი, თითქოს რობერტს არაფერი გაუკეთებია. თუ ერთ ადამიანს მაინც აქვს ნანახი მისი თუნდაც ერთი სპექტაკლი, ის არ დაიჯერებს იმას, თითქოს მისი შემოქმედება არ ვარგა“, – ამბობს ჩხიკვაძე და უერთდება რუსთაველის თეატრის ახალი და ძველი თაობების მიმართვას, რომლებიც რობერტ სტურუას თეატრში დაბრუნებას მოითხოვენ.