საზოგადოება
ხობელები ქალაქის დღეს იზეიმებენ

xobiროგორც საქინფორმის რეგიონული კორესპონდენტი ზუგდიდიდან გვატყობინებს, 30 წლის წინათ ხობს ქალაქის სტატუსი მიენიჭა. ხობის მუნიციპალიტეტის საკრებულოს თავმჯდომარე მამუკა ჭოხონელიძემ საკრებულოს სხდომაზე წამოაყენა ინიციატივა – დაწესდეს ქალაქის დღე და ყოველ ზაფხულს აღინიშნოს ხობქალაქობა.

რაც შეეხება ქალაქის დღის აღნიშვნის თარიღს, საკრებულოს თავმჯდომარის განცხადებით, უპრიანია, ის ყოველწლიურად აგვისტოს ბოლო შაბათ-კვირას აღინიშნოს, რადგანაც ამ დროისათვის ხობში მცხოვრებთა უმეტესობა შვებულებიდან უკვე დაბრუნებულია, ახალგაზრდების ძირითადი ნაწილი საკუთარ ოჯახშია და ემზადება ახალი სასწავლო წლისათვის.

„ქალაქის დღის ზეიმით გავაცილოთ ცხელი ზაფხული და ახალი შემართებით, განახლებული ენერგიით, დადებითი ემოციებით დამუხტული შევუდგეთ ჩვენს საქმიანობას“, – აღნიშნა მამუკა ჭოხონელიძემ.

საკრებულოს წევრები მიესალმნენ საკრებულოს თავმჯდომარის ამ ინიციატივას.

ასე რომ, წელს პირველად აღინიშნება ხობქალაქობა, რომელიც მარიამობის დღესასწაულს ემთხვევა.

 

საქინფორმი