ივანე ჯავახიშვილის სახელობის თბილისის სახელმწიფო უნივერსიტეტის პროფესორებისა და სტუდენტებისგან შემდგარმა ჯგუფმა, რომელსაც ზვიად კვიციანი ხელმძღვანელობდა, მესტიაში გათხრების პირველი ეტაპი დაასრულა. არქეოლოგებმა ჭუბერში, მულახსა და იფარში უძველესი ნაკეთობები აღმოაჩინეს. ჭუბერში გვიანი ანტიკური ხანის კერამიკული ქურის  ფრაგმენტები, ქურის საბერავი მილები, რკინის ცული და სხვა მნიშვნელოვანი ნაკეთობებია აღმოჩენილი. არქეოლოგების თქმით, ამ ადგილზე  IV-VI საუკუნეეშში კერამიკული საამქრო უნდა ყოფილიყო.

სპეციალისტებმა მულახის თემში მინის საწარმოც აღმოაჩინეს, რომელიც დასავლეთ საქართველოში პირველია. აღმოჩენა ძველი წელთაღრიცხვით I საუკუნით თარიღდება. აქვე აღმოჩნდა მინის ფერადი მძივები, რომელთა შემადგენლობაში ადგილობრივი მინერალებია, რაც იმას მოწმობს, რომ მძივი მესტიაშივეა დამზადებული.

არქეოლოგიური აღმოჩენა მესტიაში ამით არ დასრულებულა, სოფელ იფარში არქეოლოგების ჯგუფმა გვიანი ბრინჯაოს ხანის სამაროვნები და ნამოსახლარი აღმოაჩინა. ამ პერიოდის არქეოლოგიური ძეგლები არათუ სვანეთისთვის, არამედ კოლხეთის დაბლობისთვისაც იშვიათია.

არქეოლოგიური ექსპედიცია ზვიად კვიციანის ხელმძღვანელობით გათხრების განახლებას  შემოდგომისთვის გეგმავს. ჯგუფი ამჟამად ექსპედიციისთვის საჭირო თანხების მოძიებითაა დაკავებული.