საქართველო, 27 ნოემბერი, საქინფორმი. აჭარის უმაღლესი საბჭოს ახლადარჩეული წევრები 26 ნოემბერს 12:00 საათზე საკანონმდებლო ორგანოს პირველ სხდომაზე შეიკრიბნენ. უმაღლესი საბჭოს არჩევნები 26 ოქტომბერს, საქართველოს საპარლამენტო არჩევნების პარალელურად გაიმართა. ოპოზიციამ საკანონმდებლო საქმიანობაში მონაწილეობაზე უარი თქვა. ისინი აცხადებენ, რომ საპარლამენტო არჩევნები გაყალბდა და შედეგების გაუქმებას ითხოვენ.

უმაღლესი საბჭოს სხდომა საკანონმდებლო ორგანოს შენობის წინ ორგანიზებული საპროტესტო აქციის ფონზე მიმდინარეობდა. აქციაზე ახლად მოწვეულ საბჭოს „არაკონსტიტუციური“ და „არალეგიტიმური“ უწოდეს.

აჭარის უმაღლესი საარჩევნო კომისიის ინფორმაციით, უმაღლესი საბჭოს მანდატები ასე გადანაწილდა: 13 მანდატი „ქართულ ოცნებას“, 4 მანდატი „ერთიანობა-ნაციონალურ მოძრაობას“, 2 მანდატი „გახარია – საქართველოსთვის“, 1 მანდატი „კოალიციას  ცვლილებისთვის“ და 1 მანდატი „ძლიერ საქართველოს“.

ჩვეული პროცედურული პრაქტიკის შესაბამისად, ფრაქცია „ქართულმა ოცნებამ“ უმაღლესი საბჭოს თავმჯდომარის თანამდებობაზე დავით გაბაიძე წარადგინა; ამასთან, საბჭოს თავმჯდომარის მოადგილედ რამაზ ჯინჭარაძე აირჩიეს.

უმაღლესი საბჭოს კომიტეტების თავმჯდომარეები „ქართული ოცნების“ წევრებმა შემდეგნაირად აირჩიეს:

ფრიდონ ფუტკარაძე – აგრარულ და გარემოს დაცვის საკითხთა კომიტეტი

ცოტნე ანანიძე – ადამიანის უფლებათა დაცვის კომიტეტი

დავით ბაციკაძე – განათლების, მეცნიერების, კულტურისა და სპორტის კომიტეტი

ტიტე აროშიძე – საკონსტიტუციო, იურიდიულ და საპროცესო საკითხთა კომიტეტი

მარინე გვიანიძე – საფინანსო, საბიუჯეტო და ეკონომიკურ საკითხთა კომიტეტი

ვახტანგ ბერიძე – ჯანმრთელობის დაცვისა და სოციალურ საკითხთა კომიტეტი

კომიტეტები დაკომპლექტდა უმაღლეს საბჭოში „ქართული ოცნების“ წევრებით:

აგრარულ და გარემოს დაცვის საკითხთა კომიტეტი – ვახტანგ ბერიძე, მარინე გვიანიძე, მინდია დიასამიძე, ფრიდონ ფუტკარაძე;

ადამიანის უფლებათა დაცვის კომიტეტი – ცოტნე ანანიძე, მინდია დიასამიძე, ფატი ხალვაში, რამაზ ჯინჭარაძე;

განათლების, მეცნიერების, კულტურისა და სპორტის კომიტეტი – დავით თედორაძე, დავით ბაციკაძე, გოგი ფუტკარაძე, ფატი ხალვაში;

საკონსტიტუციო, იურიდიულ და საპროცესო საკითხთა კომიტეტი – ტიტე აროშიძე, დავით ბაციკაძე, მამუკა თურმანიძე, ფრიდონ ფუტკარაძე;

საფინანსო, საბიუჯეტო და ეკონომიკურ საკითხთა კომიტეტი – ტიტე აროშიძე, მარინე გვიანიძე, მამუკა თურმანიძე, გოგი ფუტკარაძე;

ჯანმრთელობის დაცვისა და სოციალურ საკითხთა კომიტეტი – ცოტნე ანანიძე, ვახტანგ ბერიძე, დავით თედორაძე, რამაზ ჯინჭარაძე.