როგორც საქინფორმის რეგიონული კორესპონდენტი სამეგრელოში ზუგდიდიდან გვატყობინებს, ამ წუთებში განათლების სამინისტროს ზუგდიდის რესურსცენტრის შენობის წინ აქცია მიმდინარეობს. სოფელ ოქტომბრის მოსახლეობა საჯარო სკოლის დახურვას აპროტესტებს. ოქტომბრის №1 საჯარო სკოლის დახურვის შესახებ მშობლებმა რამდენიმე დღის წინათ გაიგეს. გაუქმებულ სკოლას სოფელ ოქტომბრის თარგამულის უბანში მდებარე ყოფილ საბაზო სკოლას უერთებენ. თარგამულის სკოლაში მხოლოდ 30 მოსწავლეა, ოქტომბრის სკოლაში კი 150-მდე მოსწავლე სწავლობს. ბავშვებს თარგამულის სკოლამდე 7-10 კილომეტრის გავლა მოუწევთ, რის გამოც მათ სკოლის ავტობუსის დანიშნვა მოითხოვეს, ამაზე კი უარი მიიღეს.

ოქტომბრის სკოლას რემონტი შარშან ჩაუტარდა, ის გადაიხურა და მეტალოპლასტმასის კარ-ფანჯრებიც ჩაისვა. საინტერესოა, თუ მის დახურვას აპირებდა განათლების სამინისტრო, რატომ ხარჯავდა ათასობით ლარს?!

მიმდინარე აქციაზე კომენტარს არ აკეთებს განათლების სამინისტროს რესურსცენტრის დირექტორი აზა ჯოჯუა.

შეგახსენებთ, რომ ზუგდიდში სკოლების დახურვა პირველი შემთხვევა არ არის. რამდენიმე დღის წინათ სოფელ ოდიშისა და ხეცერას საბაზო სკოლებიც დაიხურა. სკოლების დახურვას აზა ჯოჯუა მაშინ მოსწავლეების მცირე კონტინგენტით ხსნიდა. თუმცა საინტერესოა სოფელ ოქტომბრის შემთხვევა, როცა 150-მოსწავლიან სკოლას 30-მოსწავლიან საბაზო სკოლას უერთებენ, თანაც, მაშინ, როცა თარგამულის სკოლა ოქტომბრის სკოლაზე ბევრად უარეს მდგომარეობაშია და მისი რემონტი განათლების სამინისტროს საკმაო თანხა დაუჯდება.