საქართველო, 19 ივნისი, საქინფორმი. ეკონომიკისა და მდგრადი განვითარების მინისტრის მოადგილემ, გენადი არველაძემ ევროპასთან ინტეგრაციისა და დარგობრივი ეკონომიკისა და ეკონომიკური პოლიტიკის საპარლამენტო კომიტეტების ერთობლივ გასვლით სხდომაზე ენერგეტიკის დარგში ასოცირების შესახებ შეთანხმებით გათვალისწინებული ვალდებულებების შესრულების ათწლიანი (2014-2024 წლების) შედეგების ანგარიში წარადგინა. საკომიტეტო სხდომა წალენჯიხის მუნიციპალიტეტში, ენგურჰესის მიმდებარე ტერიტორიაზე გაიმართა.

გენადი არველაძის თქმით, 2014 წელს ასოცირების ხელშეკრულებაზე ხელმოწერით საქართველომ აიღო ვალდებულება, განახორციელოს ევროკავშირის კანონმდელობასთან დაახლოება, მათ შორის, ენერგეტიკის მიმართულებით, რომელიც დაყოფილია ელექტროენერგიის, ბუნებრივი აირის, ნავთობის, ნახშირწყალბადის რესურსების ძიება-მოპოვების, განახლებადი ენერგიისა და ენერგოეფექტურობის ნაწილებად. მისი თქმით, 2017 წელს საქართველო ენერგეტიკული გაერთიანების სრულუფლებიანი წევრი გახდა, რითიც კიდევ ერთხელ, მკაფიოდ დაადასტურა ვალდებულება, მოახდინოს ეროვნული ენერგეტიკული კანონმდებლობის ჰარმონიზაცია ევროკავშირის შესაბამის დირექტივებსა და რეგულაციებთან.

გენადი არველაძის განცხადებით, საკანონმდებლო კუთხით ენერგეტიკის სფეროში ასოცირების შეთანხმებით გათვალისწინებული ვალდებულებების 80% უკვე შესრულებულია და დარჩენილი სამუშაოს შესრულება მომდევნო ორი წლის განმავლობაში იგეგმება.

მინისტრის მოადგილემ ყურადღება გაამახვილა რეგიონული მნიშვნელობის ენერგეტიკულ პროექტზე, რომლის თანახმადაც, შავი ზღვის ფსკერზე გამავალი წყალქვეშა კაბელის მეშვეობით საქართველოსა და რუმინეთის ენერგოსისტემები ერთმანეთს დაუკავშირდება. ამჟამად პროექტში ჩართულია ასევე აზერბაიჯანი და უნგრეთი. მისი თქმით, ამავე წელს საქართველოს მთავრობის მიერ დამტკიცდა განახლებადი წყაროებიდან ენერგიის წარმოებისა და გამოყენების ახალი მხარდაჭერის სქემა, რომელმაც მნიშვნელოვნად წაახალისა საქართველოში ენერგეტიკული პროექტების განხორციელება საჯარო და კერძო თანამშრომლობის ფორმით, კონკურენტული სიმძლავრის აუქციონების საფუძველზე. აღნიშნული მექანიზმის ფარგლებში 2023-2024 წლებში უკვე ჩატარდა 2 სიმძლავრის აუქციონი, ჯამურად 1100 მგვტ სიმძლავრეზე.

გენადი არველაძემ ყურადღება გაამახვილა ენერგეტიკული უსაფრთხოების გაუმჯობესების მიმართულებით განხორციელებულ ღონისძიებებზე. „ბოლო 10 წლის განმავლობაში აშენდა და ექსპლუატაციაში შევიდა 8 ქვესადგური და სხვადასხვა ელექტროგადამცემი, მათ შორის, ორჯაჭვა ხაზები, ასევე დაახლოებით 738 მგვტ სიმძლავრის სადგურები, მათ შორის, 57 ჰიდრო და ერთი ქარის ელექტროსადგური“, – აღნიშნა მინისტრის მოადგილემ.

გენადი არველაძემ განსაკუთრებულად გამოყო 2023 წელს საქართველოსა და ევროკავშირს შორის მაღალი დონის ენერგეტიკული დიალოგი, რაც, სამომავლოდ, კიდევ უფრო გააღრმავებს საქართველოს თანამშრომლობას ევროკავშირთან ენერგეტიკის სექტორში.

მოხსენებაში მინისტრის მოადგილემ ასევე გაამახვილა ყურადღება ენერგეტიკული ბაზრის გახსნაზე, გადამცემი სისტემის ოპერატორების გამიჯვნაზე, ენერგეტიკისა და კლიმატის ეროვნულ ინტეგრირებულ გეგმებსა და მნიშვნელოვან საკითხებზე. მისი თქმით, საქართველომ მნიშვნელოვანი პროგრესი აჩვენა ენერგეტიკის სექტორის ევროკავშირის სტანდარტებთან შესაბამისობაში მოყვანის თვალსაზრისით და ეს პროცესი დღესაც აქტიურად გრძელდება.

საკომიტეტო მოსმენაში ასევე მონაწილეობდნენ სამინისტროს ეკონომიკური პროფილის დეპარტამენტებისა და სახელმწიფო ენერგეტიკული კომპანიების ხელმძღვანელები.

ინფორმაციას ეკონომიკის სამინისტროს პრესსამსახური ავრცელებს.