საქართველო, 18 ივნისი, საქინფორმი. რუსეთის პრეზიდენტმა ვლადიმერ პუტინმა თავდაცვის მინისტრის ოთხი მოადგილე გაათავისუფლა და ერთ-ერთ მოადგილედ ნათესავი დანიშნა. ამის შესახებ ინფორმაციას სააგენტო Reuters-ი ავრცელებს.

ვლადიმერ პუტინმა თავდაცვის მინისტრის ოთხი მოადგილე გაათავისუფლა და მინისტრის ერთ-ერთ მოადგილედ, ანა ცივილევა დანიშნა, რომელიც რუსული მედიის ცნობით, ვლადიმერ პუტინის ბიძაშვილის ქალიშვილია.

რუსეთის თავდაცვის მინისტრის, ანდრეი ბელუსოვის პირველი მოადგილე ლეონიდ გორნინი იქნება. ასევე, თავდაცვის მინისტრის ერთ-ერთი მოადგილე ყოფილი პრემიერ-მინისტრის, მიხეილ ფრადკოვის უმცროსი ვაჟი და რუსეთის პრეზიდენტის ადმინისტრაციის უფროსის ყოფილი პირველი მოადგილე, პაველ ფრადკოვი გახდება.

ვლადიმერ პუტინის ბრძანებით, თავდაცვის მინისტრს 10-ის ნაცვლად 12 მოადგილე ეყოლება.

interpressnews.ge