ბათუმში პოლონეთისა და საქართველოს პრეზიდენტების შეხვედრის დასრულების შემდეგ გამართულ ერთობლივ პრესკონფერენციაზე სააკაშვილმა პოლონელ კოლეგას საქართველოს შესახებ პოლონეთში გამოცემული წიგნი „გაუმარჯოს“ აჩუქა. კომოროვსკიმ კი, თავის მხრივ, ქართველ კოლეგას მადლობა გადაუხადა და ორი ქვეყნის მეგობრულ და თბილ ურთიერთობებზე გაამახვილა ყურადღება.

„ჩვენ ხელს შევუწყობთ საქართველოს ნატოსა და ევროკავშირში გაწევრებას, საქართველოს რეკომენდაციებსაც მივაწვდით. თანამშრომლობა ყველა სფეროში უნდა გავაძლიეროთ, განსაკუთრებით – ეკონომიკის კუთხით. საქართველოში ინვესტორები უნდა ჩამოვიდნენ და ინვესტიციები განახორციელონ. ჩვენი კარი ღიაა ქართველი ინვესტორებისთვისაც. საქართველოს განვითარების სწორი გზა აქვს არჩეული და დადგა დრო, რომ ორი ქვეყნის მეგობრობა ახალ ეტაპზე გადავიდეს“, – განაცხადა კომოროვსკიმ.

ამასთან, კომოროვსკის ვიზიტის ფარგლებში ორი ქვეყნის საგარეო საქმეთა მინისტრების მოადგილეებმა მემორანდუმს მოაწერეს ხელი, რომელიც სხვადასხვა, მათ შორის, კულტურისა და სპორტის სფეროებში თანამშრომლობას ითვალისწინებს.