საქართველო, 19 მარტი, საქინფორმი. რაც შეეხება "ვეტინგის" სისტემას, თამამად შეგვიძლია ეს საკითხი აბსოლუტურად დახურულად გამოვაცხადოთ, - ამის შესახებ "ქართული ოცნების" აღმასრულებელმა მდივანმა, საპარლამენტო უმრავლესობის ლიდერმა, მამუკა მდინარაძემ უმრავლესობის სხდომის დასრულების შემდეგ განაცხადა.

მამუკა მდინარაძის მტკიცებით, ხელისუფლება არ დაუშვებს, რომ ხელისუფლების რომელიმე შტოს წარმომადგენლების საკითხის გადაწყვეტა სხვა ქვეყნის მოქალაქეებზე იყოს დამოკიდებული.

მდინარაძის თქმით, "ქართული ოცნება" ამ საკითხში "კატეგორიული და პრინციპულია" და სუვერენიტეტზე, კონსტიტუციასა და დამოუკიდებლობაზე "დარტყმას საკუთარი ხელით ნამდვილად არ აპირებს".

„რაც არ უნდა მოხდეს, ჩვენი ხელისუფლება არასდროს დაუშვებს არცერთ სფეროსთან დაკავშირებით ისეთი სისტემის შექმნას, სადაც საქართველოს ან მისის ხელისუფლების რომელიმე შტოს წარმომადგენლების საკითხის გადაწყვეტა დამოკიდებული იქნება სხვა ქვეყნის მოქალაქეებზე, როგორი მეგობრული დამოკიდებულებაც არ უნდა გვქონდეს ამ სხვა ქვეყნებთან. კატეგორიულად და პრინციპულად ვაცხადებთ, რომ სუვერენიტეტზე, ქვეყნის კონსტიტუციაზე და დამოუკიდებლობაზე დარტყმას ჩვენ საკუთარი ხელით ნამდვილად არ ვაპირებთ. ამიტომ ეს საკითხი დახურულია და თავს ნუ შეიწუხებენ ზედმეტი დაძალებისგან თუ პიარკამპანიებისგან", - განაცხადა მამუკა მდინარაძემ.