საქართველო, 8 თებერვალი, საქინფორმი. ბიუჯეტთან დაკავშირებით გარკვეული ცვლილებები გვაქვს - 2024 წლის ბიუჯეტი მილიარდ 763 მილიონია და აღნიშნული ცვლილებებით, რომლებსაც დღეს განვიხილავთ, დედაქალაქის ბიუჯეტი 2 მილიარდი ლარი გახდება, - ამის შესახებ თბილისის მერმა, კახა კალაძემ მუნიციპალიტეტის მთავრობის სხდომაზე განაცხადა.

თბილისის მერის განცხადებით, მიმდინარე წელს მერია დამატებით, 40 ერთეულ 18-მეტრიან ავტობუსს შეიძენს.

„მინდა ბიუჯეტთან დაკავშირებით საზოგადოებას მივაწოდო ინფორმაცია. გვაქვს გარკვეული ცვლილებები, რომლის შეტანა გვინდა არსებულ დამტკიცებულ ბიუჯეტში, დღეს გვინდა მთავრობის სხდომაზე განვიხილოთ ეს ყველაფერი, შემდეგ საკრებულოს გადაეგზავნება. ბიუჯეტში აისახება გარდამავალი ნაშთები, რომლებიც შედგება გადაჭარბებული შემოსავლებისგან. ასევე, გარკვეული კომპონენტი გახლავთ გარდამავალ პროექტებზე გადმოყოლილი თანხები. თქვენ იცით, რომ 2024 წლის ბიუჯეტი მილიარდ 763 მილიონია და აღნიშნული ცვლილებებით, რომლებსაც დღეს განვიხილავთ, დედაქალაქის ბიუჯეტი 2 მილიარდი ლარი გახდება. აღნიშნული დამატებითი თანხებით გათვალისწინებულია სხვადასხვა მნიშვნელოვანი მუნიციპალური პროექტების განხორციელება.

მინდა ინფორმაციის სახით გითხრათ, რომ ვიწყებთ პროცედურებს, რომ დამატებით შევისყიდოთ 40 ერთეული 18-მეტრიანი ავტობუსი. თავიდან დავაანონსეთ 200 ერთეულის შეძენა, თუმცა იმის გამო, რომ თანხები საკმარისი არ გვქონდა, შევიძინეთ მხოლოდ 160 ერთეული. წელს გვინდა დამატებით ის 40 ერთეულიც შევიძინოთ.

ჯანდაცვის სამსახურში, სხვადასხვა სოციალური პროგრამებისთვის გამოიყოფა 4 300 000 (4 მლნ 300 ათასი) ლარი ინფრასტრუქტურის განვითარების სამსახურს ემატება დაახლოებით 17 მლნ ლარი სხვადასხვა მნიშვნელოვანი პროექტების განსახორციელებლად. მათ შორის არის მუხიანის აგარაკების კანალიზაციის პროექტი და გარე განათება სამგორში, გახოკიძის ქუჩაზე. გარემოს დაცვის სამსახურს 36 მლნ ლარი ემატება, რაც გადანაწილდება ვაკის პარკისთვის, სამხედრო ქალაქში ახალი პარკის მოსაწყობად, ვერის ბაღის რეაბილიტაციისთვის, გლდანის ტბისთვის, სხვადასხვა სკვერებისა და რეკრეაციული სივრცეების მოსაწესრიგებლად.კულტურის, განათლების, სპორტისა და ახალგაზრდული მიმართულებით გამოიყოფა 19 მლნ ლარი, საიდანაც 13,5 მოხმარდება ბაგა-ბაღების სარეაბილიტაციო სამუშაოებს, ხოლო 5 მლნ ლარი - დიღმის მასივში სპორტკომპლექსის მშენებლობის სამუშაოებს. „თბილსერვის ჯგუფს“ ეძლევა დაახლოებით 37 მილიონი ლარი სხვადასხვა ინფრასტრუქტურული სამუშაოებისთვის. მათ შორის, ნაგავშემკრები კონტეინერებისა და დამატებითი სპეცტექნიკის შესასყიდად, ასევე გამგეობებს ემატება ჯამში 13 მლნ ლარი“,- განაცხადა კახა კალაძემ.