საქართველო, 19 იანვარი, საქინფორმი. უნგრეთის მთავრობა საფრთხეს უქმნის ევროკავშირის ღირებულებებს, ინსტიტუტებსა და ფონდებს,- ამის შესახებ ნათქვამია ევროპარლამენტის მიერ მიღებულ რეზოლუციაში. შესაბამის დოკუმენტს 345-მა ევროპარლამენტარმა მისცა ხმა, 104 წინააღმდეგი იყო, 29-მ კი თავი შეიკავა.

რეზოლუციაში ხაზგასმულია ევროკავშირის ინსტიტუტებისა და ღირებულებების დაცვის აუცილებლობა ევროკავშირის საბჭოში უნგრეთის თავმჯდომარეობის დროს.

ევროპარლამენტი გმობს უნგრეთის მთავრობის მიზანმიმართულ, მუდმივ და სისტემატურ ძალისხმევას, რომელიც მიმართულია ევროკავშირის ფუნდამენტური ღირებულებების ძირის გამოთხრისკენ.

რეზოლუციაში დეპუტატები შეშფოთებას გამოთქვამენ უნგრეთში დემოკრატიის, კანონის უზენაესობისა და ფუნდამენტური უფლებების შესუსტების გამო, კერძოდ, ახლახან მიღებული „ეროვნული სუვერენიტეტის დაცვის” კანონმდებლობის გამო, რომელსაც რუსეთის „უცხოური აგენტების კანონს“ ადარებენ.

ევროპარლამენტარები გმობენ პრემიერ-მინისტრის, ვიქტორ ორბანის ქმედებებს, რომელმაც გასულ დეკემბერს დაბლოკა ევროკავშირის გრძელვადიანი ბიუჯეტი, უკრაინის დახმარების პაკეტთან ერთად. აღნიშნული ქმედება რეზოლუციაში შეფასებულია, როგორც ევროკავშირის სტრატეგიული ინტერესების აბსოლუტური უპატივცემულობა და დარღვევა. ევროპარლამენტის წევრები აღნიშნავენ, რომ ევროკავშირი არ უნდა დაემორჩილოს შანტაჟს.

ამასთან, ევროპარლამენტი წუხილს გამოთქვამს ევროკომისიის გადაწყვეტილების გამო, რომელმაც განბლოკა უნგრეთისთვის გაყინული ფონდებიდან 10,2 მილიარდი ევრო იმის მიუხედავად, რომ უნგრეთს არ ჰქონდა შესრულებული სასამართლოს დამოუკიდებლობის რეფორმა.

ევროპარლამენტის წევრები ასევე ეჭვქვეშ აყენებენ, შეძლებს თუ არა უნგრეთის მთავრობა თავის მოვალეობების შესრულებას 2024 წლის მეორე ნახევარში, როდესაც უნგრეთი ევროკავშირის საბჭოს თავმჯდომარეობას გადაიბარებს. ევროპარლამენტარები აღნიშნავენ, რომ თუ ევროპული საბჭოს პრეზიდენტის თანამდებობა ვაკანტური იქნება, მისი უფლებამოსილების შესრულება უნგრეთის პრემიერ-მინისტრს დაევალება საბჭოში მისი ექვსთვიანი თავმჯდომარეობის პერიოდში.

დეპუტატები სთხოვენ საბჭოს, იპოვონ გამოსავალი ამ რისკების შესამსუბუქებლად და ასევე მას საბჭოში გადაწყვეტილების მიღების პროცესის რეფორმირებისკენ მოუწოდებენ, რათა დასრულდეს ვეტოს უფლების ბოროტად გამოყენება და შანტაჟი.

1tv.ge