საქართველო, 12 დეკემბერი, საქინფორმი. აზერბაიჯანი სახმელეთო საზღვრებს 2024 წლის 2 აპრილამდე არ გახსნის. ამის შესახებ ინფორმაციას აზერბაიჯანული მედია მინისტრთა კაბინეტის გადაწყვეტილებაზე დაყრდნობით ავრცელებს. როგორც ინფორმაციაშია აღნიშნული აზერბაიჯანის მთავრობამ მიიღო გადაწყვეტილება, კიდევ ერთხელ გაახანგრძლივოს კორონავირუსის პანდემიის გამო მოქმედი შეზღუდვა.

აზერბაიჯანის სახმელეთო საზღვრები 2020 გაზაფხულიდან არის დაკეტილი. ბაქოში აცხადებენ, რომ კარანტინის რეჟიმი იმდენ ხანს იქნება ძალაში, ვიდრე ამის საჭიროება იქნება.

აზერბაიჯანში შესვლა მხოლოდ საჰაერო გზით არის შესაძლებელი. ამასთან, უცხო ქვეყნის მოქალაქეებს აზერბაიჯანის დატოვება სახმელეთო გზით შეუძლიათ.

ცნობისთვის, 2024 წლის თებერვალში აზერბაიჯანში ვადამდელი საპრეზიდენტო არჩევნები უნდა გაიმართოს.