„ვისოლმა“ ქუთაისის „ტორპედო“ გასულ წელს ჩაიბარა და მნიშვნელოვანი ინვესტიციებიც განახორციელა. კლუბის ჩამოყალიბების პროცესი დღემდე გრძელდება და როგორც კლუბის პრეზიდენტი ლევან ფხაკაძე ამბობს, დახარჯვა თანხებში კვლავ ექნებათ, ვინაიდან სპორტში სხვანაირად შედეგს ვერ მიაღწევ. გადაყარა თუ არა „ვისოლმა“ ტრანსფერებში ფული და რას ჰპირდება კლუბის პრეზიდენტი ქუთაისელ ქომაგს?

საქინფორმი ლევან ფხაკაძეს ესაუბრა.
– რატომ გადაწყვიტა „ვისოლმა“ „ტორპედოს“ შეძენა, თქვენ ხომ დღემდე გაქვთ საფეხბურთო აკადემია „ავაზა“?
– პირველი ასეთი ნაბიჯი 2007 წელს გადავდგით – შევიძინეთ ლეგენდარული საფეხბურთო სკოლა „ავაზა“. მაშინ აკადემიაში  შესაკეთებელი იყო ინფრასტრუქტურა, დაარსების შემდეგ არაფერი გაკეთებულა და, ბუნებრივია, მენეჯმენტიც საკმაოდ მძიმე მდგომარეობაში დაგვხვდა. ერთი წლის განმავლობაში სრული მოდერნიზაცია განიცადა და დღეს „ავაზა“ თანამედროვე ტიპის საფეხბურთო სკოლაა.
სექტემბრიდან აკადემია კიდევ უფრო შეიცვლება. ბევრ  სიახლეს შევთავაზებთ ქართული ფეხბურთის გულშემატკივარს და ბავშვებს. კერძოდ, ვაპირებთ, სამწვრთნელო მენეჯმენტის დაკომპლექტებას. ახლა ვსაუბრობთ რამდენიმე პირთან ევროპაში, რომელთაც აქვთ უზარმაზარი გამოცდილება ბავშვების წვრთნასა და აღზრდის მეთოდიკაში, რადგან ეს პრობლემა საქართველოში აქტუალურია.
„ავაზა“ უახლოეს მომავალში გადაეცემა „ტორპედო ქუთაისს“, რადგან ერთი ორგანიზმი და გუნდია, ამიტომ მენეჯმენტის სრულყოფისთვის გვირჩევნია,  „ავაზას“ მენეჯმენტს მართავდეს „ტორპედო ქუთაისი“.

– ხმაურიანი ტრანსფერების შემდეგ ბევრ გულშემატკივარს აინტერესებს – არის კიდევ მოსალოდნელი ტრანსფერები...
– ჯერჯერობით, ორი ფეხბურთელია „ოლიმპიდან“. ეს არის მთავარი მწვრთნელის მითითება და შეთანხმება. ისე კი ტრანსფერებზე თავს არ ვიკავებთ, ბუნებრივია, ასეთი მესიჯები უნდა მოდიოდეს მწვრთნელისგან...
– გასული სეზონის წინ იყო დაპირება, რომ გუნდს ექნებოდა ფანმაღაზია. ამ მხრივ თუ იგეგმება რაიმე ფეხბურთელთათვის ხელმისაწვდომი?
– თითქმის დავასრულეთ ქუთაისში ფანკლუბის ორგანიზება. რაც შეეხება მაღაზიას, გვინდა, სტადიონზე გავხსნათ. მოვიძიეთ კომპანიები, რომლებიც შეგვიკერავენ მაისურებს, ატრიბუტიკას და სეზონის განმავლობაში დავიწყებთ რეალიზებას.
– ევროპაში კლუბების ერთ-ერთი შემოსავლის წყარო ბილეთების რეალიზაციიდან მიღებული თანხებია. ქუთაისს აქვს იმის პოტენციალი, რომ კლუბის ბიუჯეტმა მნიშვნელოვანი შემოსავალი მიიღოს ამ მხრივ და თუ იგეგმება რაიმე ღონისძიება დასწრების მაჩვენებლის გასაზრდელად?
– რამდენად უზრუნველყოფს გულშემატკივრებით სავსე სტადიონი ჩვენს ფინანსურ მდგრადობასა და შემოსავლებს, ძნელი სათქმელია, ვინაიდან თითოეული თამაშის ორგანიზება და ჩატარება უფრო ძვირი გვიჯდება, ვიდრე გაყიდული ბილეთებიდან შემოსული შემოსავალია, ბილეთის ფასი მხოლოდ ორი ლარია. როდესაც ვსაუბრობთ ევროპის კლუბებზე, იქ ბიუჯეტის 30% სწორედ ბილეთებიდან შემოსული თანხებით იფარება. იქ ბილეთის ფასი ნამდვილად არ არის ერთი ევრო. ეს შემოსავალი ჩვენთვის ვერ იქნება ფინანსური მდგრადობის გარანტი; ეს, უბრალოდ, ქმნის გარემოს, რომელიც აუცილებელია ფეხბურთელის თამაშისთვის. მაყურებლის მოზიდვის მიზნით თითოეული თამაშის წინ მიმდინარეობს სერიოზული პიარი, გვაქვს აქციები ბენზინგასამართ სადგურებზე, კვლავ ვიწყებთ აბონემენტების გაყიდვას... სტადიონის ინფრასტრუქტურა სრულად უნდა იყოს მოწესრიგებული, რომ უეფამ საერთაშორისო თამაშების ჩატარების ნება დაგრთოს. ჩემპიონატის დასრულებისთანავე დავიწყეთ საფარის გამოცვლა, შეიცვალა დრენაჟი  და დამონტაჟდა სარწყავი სისტემა. 7 აგვისტოს ახალი სეზონის პირველ თამაშს ჩავატარებთ ახალ საფარზე, ეს მნიშვნელოვანია ფეხბურთელებისთვისაც და გულშემატკივარს შევთავაზებთ კარგ სანახაობას.
– „ავაზაზე“ მოვარჯიშე ქალთა გუნდი „ვისოლის“ საკუთრება უნდა გამხდარიყო. რა ხდება ახლა და თუ გეგმავთ ქალთა ფეხბურთის განვითარებას?
– შემდგომ ეტაპზე ეს არ არის გამორიცხული. ყველაფერს ერთად ვერ მოვედებით. თუმცა სტაბილურობის შემდეგ ამ საქმესაც მივხედავთ.
– რამდენად მართალია, რომ თითქოს რაგბის გულშემატკივრები განაწყენდნენ თქვენ მიერ „ყოჩების“ პატრონობაზე უარისთქმით...
– „ყოჩებთან“ დაკავშირებით ყურადღების მოდუნება ბუნებრივად მოხდა –ფეხბურთმადიდი დრო წაგვართვა. მათთვის მნიშვნელოვან დროს „ყოჩებს“ გვერდით დავუდექით – არ ჰყავდათ სპონსორი და პერმანენტულად ვეხმარებოდით ხან თანხით, ხან საწვავით... თუმცა გუნდი ასე დიდხანს ვერ იარსებებდა. დღეს, სამწუხაროდ, ცოტანი არიან რაგბის დაფინანსებით დაკავებულნი. არ აქვს იმის პერსპექტივა, რომ, თუნდაც, ხმაურიან ტრანსფერს განახორციელებს, გახდება მომგებიანი. გყავდეს რაგბის კლუბი, ნიშნავს, ყოველთვის დოტაციაზე იქნება. მისი პოპულარობის მიუხედავად, დასწრება მინიმალურია, ანუ იდება კაპიტალი, რომელსაც ვერ იბრუნებ. თუმცა მათ ასე ვერ მივატოვებთ, თუ გამოჩნდებიან ჩვენი მიმდევრები, მოხარული ვიქნებით. კარგი გუნდია, კარგი ბიჭებით დაკომპლექტებული, მაგრამ სპორტში დაფინანსების გარეშე ვერაფერს მიაღწევ.
– რა იქნება ახალი მწვრთნელების უშუალო მიზანი და დავალება... რა შემთხვევაში წავლენ ისინი გუნდიდან?
– ჩვენ უფრო დიდი შედეგი მოვთხოვეთ ჩვენს მწვრთნელს. მიზანია, ვიყოთ ლიდერები. სხვა გზა არ გვაქვს. ყველა იმ საქმეში, რასაც ვაკეთებთ, ვართ ლიდერები. დარწმუნებული ვარ, „ტორპედო ქუთაისი“ გამონაკლისი არ იქნება.  ეს ამოცანა დავუსვით მთავარ მწვრთნელს. სულ მცირე, სამეულში ვიქნებით, მაგრამ ჩვენი მიზანი მხოლოდ ეს არ არის; შემადგენლობა გვაძლევს საშუალებას, უფრო მაღალი მიზნებისთვის ვიბრძოლოთ და გაცილებით დიდი ამოცანა დავისახოთ.

თუ შევძლებთ, ვიბრძოლებთ ჩემპიონობისთვის, მაგრამ სამეულში აუცილებლად ვიქნებით.

საინფორმაციო-ანალიტიკური სააგენტო „საქინფორმი“