სამეგრელო-ზემო სვანეთის გუბერნატორი ზაზა გოროზია პრემიას ყოველთვიურად იღებს. გასულ წელს გუბერნატორმა ხელფასთან გათანაბრებული პრემია 17-ჯერ აიღო. ამ სკანდალურ თემაზე რამდენიმე წუთის წინ ჟურნალისტური გამოძიება გამოაქვეყნა საინფორმაციო სააგენტო „livepress.ge“-მ. ჟურნალისტ პაატა ლაგვილავას გამოძიებიდან ირკვევა, რომ ზაზა გოროზიამ პრემია 2010 წლის მარტში, ივლისში, აგვისტოში, ოქტომბერში, ნოემბერსა და დეკემბერში ორ-ორჯერ აიღო. გოროზიას ხელფასი 2950 ლარია, იმავე თანხას ის პრემიის სახითაც იღებს, ანუ თითოეულ თვეზე რეალურად გოროზიამ შრომის ანაზღაურებისთვის 8850 ლარი მიიღო, რაც მისი გასამმაგებული პრემიაა. პრემია 15-ჯერ აიღო გოროზიამ 2009 წელსაც. ამის პარალელურად, „ქამრების შემოჭერის“ პოლიტიკის მიუხედავად, კატასტროფულად იზრდება გუბერნატორის ადმინისტრაციის ხარჯებიც. 2009 წელთან შედარებით, 2010 წელს ადმინისტრაციის ხარჯები 160 ათასი ლარით გაიზარდა. გუბერნატორმა გოროზიამ პრემია 2010 წლის მაისში შვებულებაში ყოფნის დროსაც მიიღო. მაშინ ის იძულებით შვებულებაში მესტიის პოლიტიკური ტერორის შემდეგ გაუშვეს, თუმცა, როგორც ჩანს, ამ დანაშაულისთვის მას ხელისუფლებამ პრემია გამოუყო.

გუბერნიაში ჟურნალისტს არ პასუხობენ კითხვაზე, თუ რა დამსახურებისთვის აძლევენ გუბერნატორს ყოველთვიურად ან თვეში ორჯერ პრემიას. უწყებაში ამას ბიუჯეტში თანხის გათვალისწინებით ხსნიან.

ახალგაზრდა იურისტთა ასოციაციის იურისტი თამარ კორძაია კი მიიჩნევს, რომ „პრემია არის წამახალისებელი ღონისძიება და ის არანაირი ლოგიკით არ შეიძლება იყოს ხელფასის ოდენობის და, ზოგიერთ შემთხვევაში, ხელფასზე ორჯერ მეტიც, თან – მუდმივად გაიცეს“. კორძაიას მიაჩნია, რომ ასეთ შემთხვევაში ეს გოროზიას უშუალო ანაზღაურებაა და არა პრემია. იურისტის თქმით, „ეს არის კანონის მანკიერი ფორმა და იძლევა მსგავსი კორუფციული გადაწყვეტილებების მიღების შესაძლებლობას“. „ის რომ საჯარო მოხელეს, ამ შემთხვევაში კი, გუბერნატორს, შეუძლია ბოროტად ისარგებლოს სახელმწიფო სახსრებითა და საკუთარი უფლებამოსილებით, ეს არის ჩვენი „საჯარო სამსახურის შესახებ კანონმდებლობის“ პრობლემა, რომლის უსუსურობითაც ეს ადამიანები სარგებლობენ“, – აცხადებს კორძაია.

ამასთან, ჟურნალისტური გამოძიებით ირკვევა, რომ ზაზა გოროზია კომერციული საქმიანობითაცაა დაკავებული და მან ყურძნის რელიზაციით 12 ათასი ლარი მიიღო. ბინესმენ-გუბერნატორი ზაზა გოროზია „ლიბერთი ბანკში“ 165 ათასი ლარის მფლობელია, იმავე ბანკში 14 ათასი ლარი მისი მეუღლის ანგარიშზეც დევს. ამასთან, გუბერნატორი ნაღდ ფულად თანხასაც ფლობს. დეკლარაციაზე დაყრდნობით, ჟურნალისტი არკვევს, რომ ზაზა გოროზიას 2 700 ევრო, 5 200 ამერიკული დოლარი და 79 500 ლარი აქვს, მის მეუღლე თამთა კობახიძეს კი – 7 700 ლარი.

როგორც ჩანს, გუბერნატორ გოროზიას პორტფელი უფრო და უფრო „სქელდება“, მის რეგიონში კი მოსახლეობის ეკონომიკური მდგომარეობა დღითიდღე უარესდება – ეს ყველაფერი კი იმის ნათელი მაგალითია, როგორ „შეიხსნეს“ ნაციონალებმა „ქამრები“ „ქამრების შემოჭერის“ პრინციპის დანერგვისთანავე.