„ახალი მემარჯვენეების“ ლიდერმა დავით გამყრელიძემ განაცხადა, რომ დეპუტატთა რაოდენობის რეფერენდუმის გზით განსაზღვრა პოპულიზმია.

დეპუტატთა რაოდენობის 150-დან 190-მდე გაზრდა, რომელიც მმართველ პარტიასა და რამდენიმე ოპოზიციურ პარტიას, მათ შორის, „ახალ მემარჯვენეებს“, შორის საარჩევნო სისტემის რეფორმაზე მიღწეული შეთანხმების ერთ-ერთი მთავარი შემადგენელი ნაწილია, სადავო გახდა, რადგან ოპონენტები აცხადებენ, რომ ამგვარი ნაბიჯი ახალი რეფერენდუმის ჩატარების გარეშე, 2003 წლის რეფერენდუმის შედეგებს ეწინააღმდეგება, რომლის დროსაც ამომრჩევლებმა განაცხადეს, რომ საპარლამენტო მანდატები 150-ს არ უნდა აღემატებოდეს.

2003 წლის რეფერენდუმი იყო „პოპულიზმი და ავანტიურა შევერდნაძის გარემოცვის მიერ“, – განუცხადა გამყრელიძემ ჟურნალისტებს 2 ივლისს პარლამენტის თავმჯდომარე დავით ბაქრაძესთან იმ შეხვედრის შემდეგ, სადაც საარჩევნო სისტემის რეფორმის შესახებ შეთანხმების განხორციელებაზე იმსჯელეს.

„საზოგადოებას ხვალ რომ დაუსვათ კითხვა, რას ფიქრობენ იმაზე, პარლამენტი რომ ხვალ გავაუქმოთ, მხარს დაუჭერს; მითუმეტეს, მაშინ პარლამენტი არ იყო დიდად პოპულარული და არც ახლა არის ხალხში დეპუტატი ძალიან პოპულარული; აქედან გამომდინარე, სურვილი საზოგადოებისა ყოველთვის არის, რაც შეიძლება შემცირდეს; მაგრამ ხომ გვესმის კარგად, რომ დემოკრატიისა და წარმომადგენლობითი დემოკრატიის ყველაზე დემოკრატიული ინსტიტუტი სწორედ პარლამენტია“, – განაცხადა გამყრელიძემ.

სამი წლის წინათ, როდესაც ხელისუფლებასა და ოპოზიციას შორის საარჩევნო სისტემაზე მორიგი დავა მიმდინარეობდა, გამყრელიძე კატეგორიულად ეწინააღმდეგებოდა შემოთავაზებას დეპუტატთა რაოდენობის ზრდის შესახებ და ამ იდეას „აბსურდულს“ უწოდებდა.